चाळीसगाव (प्रतिनिधी) चाळीसगाव ते छत्रपती संभाजीनगर रस्त्यावरील रांजणगाव फाट्यावर १९ जानेवारीला दुपारी १.३० ते २ वाजेच्या दरम्यान झालेल्या भीषण अपघातात दुचाकीवरील महिला जागीच ठार झाली. तर ६ जण जखमी झाले आहेत.
चाळीसगाव तालुक्यातील खेर्डे तांडा येथील कृष्णा संजय जाधव (वय १९) आपल्या आजी चंदाबाई मलखान पवार (रा. कोंगानगर, ता. चाळीसगाव) यांना दुचाकीवर बसवून चाळीसगावकडे येत होते. यावेळी रांजणगाव फाट्यावर चाळीसगावकडून संभाजीनगरकडे भरधाव वेगाने येणाऱ्या क्रूझर (एमएच-२०, सीएच-६५२२) व दुचाकीचा समोरासमोर धडक झाली.
या अपघातात दुचाकीवरील चंदाबाई मलखान पवार यांचा जागीच मृत्यू झाला. तर दुचाकी चालक कृष्णा संजय जाधव यासह क्रूझरमधील चालक व इतर चार प्रवासी जखमी झाले. जखमींना त्वरित नजीकच्या खासगी रुग्णालयात उपचारासाठी दाखल करण्यात आले आहे. अपघातानंतर क्रूझर वाहन रस्त्यावर उलटले होते. चाळीसगाव ग्रामीण पोलीस ठाण्यात अपघाताची नोंद घेण्याची प्रक्रिया सुरू आहे.
