नाशिक (वृत्तसंस्था) साडेतीन शक्तिपठांपैकी आद्य स्वयंभू शक्तिपीठ असलेल्या श्री क्षेत्र सप्तशृंग गडावर आज आंध्र प्रदेशातील गुंटूर येथील भाविक पी. श्यामसुंदर यांनी सप्तशृंगी देवीस सुवर्ण पादुका व हिरेजडित मंगळसूत्र अक्षव्य तृतीयेच्या मुहूर्तावर अर्पण केले. हे अलंकार २ किलो वजनाचे असून किंमत दीड कोटी आहे.
कर्नाटकमधील शृंगेरी पीठाचे शंकराचार्य सप्तशृंगी गडावर १९ जानेवारी २०१९ ला दर्शनासाठी आले होते. याप्रसंगी त्यांनी देवीसाठी काय हवे अशी विचारणा विश्वस्तांकडे केली होती. भक्तांच्या मागणीनुसार विश्वस्त मंडळाने सुवर्ण पादुकांची मागणी केली होती. शृंगेरीपीठाच्या शंकराचार्यांनी त्यांचे गुंटूर येथील भक्त पी. श्यामसुंदर यांना सुवर्ण पादुका व हिरेजडित मंगळसूत्र देवीला अर्पण करण्याचे सुचवले होते.
शंकराचार्यांच्या हस्ते साडेतीन मुहूतांपैकी एक असलेल्या अक्षयतृतीयेच्या मुहूर्तावर (२७ मार्च) सप्तशृंगी निवासिनी देवी विश्वस्त संस्थेकडे हे अलंकार विधिवत पूजेसाठी सुपूर्द केले. याप्रसंगी विश्वस्त भूषणराज तळेकर, अधीक्षक प्रकाश जोशी, भगवान नेरकर उपस्थित होते. दरम्यान, ट्रस्टच्या वतीने देणगीदार भाविक श्यामसुंदर यांचा विश्वस्त मंडळाच्या ते सन्मान करण्यात आला. भक्त पी. श्यामसुंदर यांनी पुढील वर्षीच्या अक्षय्य तृतीयेस श्री भगवतीस सोन्याच्या १८ बांगड्या अर्पण करणार आहेत.
