धुळे (प्रतिनिधी) साक्री तालुक्यातील एका गावातील अल्पवयीन मुलीचा धुळ्यात गर्भपात करण्यात आला. यात रक्तस्राव अधिक प्रमाणावर झाल्याने पिडीतेचा मृत्यू झाल्याची खळबळजनक घटना घडली आहे. याप्रकरणी पिंपळनेर पोलिसांत नर्सविरोधात गुन्ह्याची नोंद करण्यात आली.
साक्री तालुक्यातील एका गावातील अल्पवयीन मुलीला लग्नाचे आमिष दाखवत तिच्यावर अत्याचार करण्यात आला. त्यातून गरोदर राहिलेल्या मुलीला धुळे शहरात आणत गर्भपात करण्यात आला. त्यासाठी एका खासगी रुग्णालयातील नर्सने पैसे घेतले. गर्भपात झाल्यावर घरी नेल्यावर मुलीचा अतिरक्तस्त्रावामुळे मृत्यू झाला. याप्रकरणी आता पीडित मुलीच्या आईने दिलेल्या तक्रारीवरून नर्स प्रमिला पवार व राज सिकलकरवर गुन्हा दाखल झाला आहे.
मुलीला घराजवळ राहणाऱ्या राज दीपक सिकलकर (वय २०) याने लग्नाचे आमिष दाखवत अत्याचार केला. त्यामुळे ही मुलगी गरोदर होती. याविषयीची माहिती समजल्यानंतर तिला सोबत घेत आईने धुळे गाठले. शहरातील साक्री रोडवरील एका खासगी हॉस्पिटलमध्ये कार्यरत असलेल्या प्रमिला पवार यांनी पीडितेच्या कुटुंबीयांकडून १० हजार रुपये घेतले. त्यानंतर मुलीचा गर्भपात करण्यात आला. त्यानंतर या मुलीला पुन्हा गावी नेण्यात आले; परंतु जास्त रक्तस्रावामुळे मुलीचा मृत्यू झाला.
याप्रकरणी पिंपळनेर पोलिस ठाण्यात अकस्मात मृत्यूची नोंद झाली होती. पीडितेच्या आईने दिलेल्या तक्रारीनंतर पोलिसांनी धुळे शहर गाठले. शिवाय साक्रीरोडवरील त्या रुग्णालयात तपासणी केली. तोपर्यंत नर्स प्रमिला पवार पसार झाली. प्रमिलाने पीडितेला फाशी पूल परिसरातील घरी नेत गर्भपात केल्याचे समोर आले आहे. संशयित राजला अटक केली आहे. त्याला न्यायालयात उभे केल्यावर पाच दिवसांची पोलिस कोठडी सुनावण्यात आली. पीडितेच्या वडिलांचा १० वर्षांपूर्वी मृत्यू झाला आहे.
