श्रीरामपूर (वृत्तसंस्था) ट्रक अन् दुचाकीच्या झालेल्या भीषण अपघातात पती-पत्नीसह चिमुकलीचा दुर्दैवी मृत्यू झाल्याची दुर्दैवी घटना कोपरगाव तालुक्यातील येसगाव शिवारात नगर-मनमाड महामार्गावर शुक्रवार दुपारच्या सुमारास घडली. अपघातानंतर ट्रक चालक फरार झाला असून सदरील ट्रक तालुका पोलिसांनी ताब्यात घेतला आहे.
कोपरगाव तालुक्यातील येसगाव शिवारात नगर-मनमाड महामार्गावर शुक्रवार दुपार तीन च्या सुमारास येवल्याकडून कोपरगावकडे जाणाऱ्या दुचाकीवरून नवरा, बायको अन् लहान मुलगी जात असताना त्यांच्या दुचाकीला कोपरगावच्या दिशेकडून मालेगावच्या दिशेने जाणाऱ्या ट्रकने जोराची धडक दिल्याने दुचाकीवरील पती (वय ३५), पत्नी (२८) आणि लहान दीड वर्षाची मुलगी असे तिघं जण हे जागीच ठार झाले.
यावेळी ट्रकचालक हा पळून जात असताना नागरिकांनी त्याचा पाठलाग करत असता त्याने महामार्गावरील हॉटेल सातबाराच्या आवारात सदरील ट्रक उभा करून धूम ठोकली. दुचाकीवरील मयत झालेल्या तिघांचे मृतदेह कोपरगाव ग्रामीण रुग्णालयात शवविच्छेदन करण्यासाठी आणण्यात आले असून पुढील तपास कोपरगाव तालुका पोलीस करत आहे. रात्री उशिरापर्यंत दुचाकीवरील तिघांची ओळख पटू शकली नव्हती.
