परभणी (वृत्तसंस्था) मानवत तालुक्यातील (जि.परभणी) यशवाडी येथून दर्शन घेऊन घरी परत जात असतांना भाविकांच्या क्रुझर जीपचा आणि ऊस घेऊन येणाऱ्या ट्रॅक्टरचा पाथरी तालुक्यातील वडी पाटीवर भीषण अपघात झाल्याने क्रुझर जीपमधील तीन भाविकांचा जागीच मृत्यू झाला, तर जीपमधील अन्य ६ भाविक गंभीर जखमी झाल्याची घटना शनिवारी (दि.१६) रात्री ११ ते ११.३० वाजेच्या सुमारात पाथरी तालुक्यातील वडी पाटीवर घडली, जखमीवर पाथरी ग्रामीण रुग्णालयात प्राथमिक उपचार करून पुढील उपचारासाठी परभणी जिल्हा सामान्य रुग्णालयात हलविण्यात आले आहे.
यशवाडी येथे आले होते हनुमानाच्या दर्शनाला !
मानवत तालुक्यातील यशवाडी येथील मंदिरात शनिवारी भाविकांची दर्शनासाठी मोठ्या प्रमाणावर गर्दी असते. परभणीसह बाहेर जिल्ह्यातून भाविक या ठिकाणी दर्शनासाठी येतात. जालना जिल्ह्यातील ब्राम्हणवाडी (ता. परतूर) या सोळंके, संतोष कुंडलिक पांचाळ, अविनाश चंदू पाटील सोळके, दशरथ सुदामराव काळे, किशोर कचरू सोळक, उमेश भरत सोळक, अण्णासाहेब हरिभाऊ सोळंके हे शनिवारी (दि.१६) क्रुझर जीप (एम.एच.२१ व्ही. ७८२२) घेऊन ब्राम्हणवाडीहून मानवत तालुक्यातील यशवाडी येथे हनुमानाच्या दर्शनाला आले होते.
तिघांचा जागीच मृत्यू !
दर्शन झाल्यानंतर उशिराने ब्राम्हणवाडी गावी परत येत असताना रात्री साधारणत ११ ते ११.३० वाजेच्या सुमारास पाथरी आष्टी रोडवरील बड़ी पाटीवर त्यांची जीप आली असता समोरून ऊसाने भरलेल्या दोन ट्रॉल्या घेऊन एक ट्रॅक्टर येत होता. रात्रीची वेळ असल्याने वाहनाच्या लाईट फोकसने चालकाला काही कळायच्या दोन्ही वाहने एकमेकांवर घडकली. अपघात एवढा भीषण होता की, क्रूझर जीप ट्रॉलीच्या ऊसामध्ये घुसली. यावेळी आजूबाजूच्या नागरिकांनी धाव घेत जीपमधील नागरिकांना बाहेर काढण्याचा प्रयत्न केला. जेसीबी मशीनच्या सहाय्याने ही जीप बाजूला करण्यात आली. यात जीपचा चालक अण्णासाहेब सोळंके (३५, रा. ब्राम्हणवाडी), अमोल मार्केड सोळंके (२८, रा. ब्राम्हणवाडी) व विश्वभर कदम (३० रा. ब्राम्हणवाडी) या तिघांचा जागीच मृत्यू झाला.
सहा जखमींवर परभणीत उपचार सुरु !
अपघातील मृतांना तसेच जखमींना जीपमधून नागरिकांना मोठ्या प्रयत्नांनी बाहेर काढले. रुग्णवाहिकेतून त्यांना पाथरी ग्रामीण रुग्णालयात दाखल करण्यात आले. जखमींवर प्राथमिक उपचार केल्यानंतर कृष्णा सोळंके (३०), संतोष पांचाळ (३५), अविनाश सोळंके (३०), दशरथ काळे (२५), किशोर सोळंके (३५) आणि उमेश भरत सोळंके (२७) या सहाजणांना पुढील उपचारासाठी परभणी येथील जिल्हा सामान्य रुग्णालयात हलविण्यात आले आहे. तर रविवारी (दि. १७) सकाळी तीन जणांचे पाथरी ग्रामीण रुग्णालयात शवविच्छेदन करून मृतदेह नातेवाईकांच्या ताब्यात देण्यात आले. या घटनेत कुझर जीपचा चुराडा झाला तर ट्रॅक्टरच्या ट्रॉलीचे नुकसान झाले आहे.
