धुळे (प्रतिनिधी) मुलीला भेटून मोटारसायकलीने धुळे येथून आपल्या गावाकडे परतणाऱ्या पित्याचा फागणे (ता.धुळे ) येथील पुलावर अपघात होऊन दुर्दैवी मृत्यू झाला. काल (दि.२५) सकाळी ९ वाजेच्या सुमारास ही दुर्घटना घडली. शिवाजी नारायण पाटील (५०) असे अपघातातील मृताचे नाव असून ते जळगाव जिल्ह्यातील सावदे (ता. भडगाव) येथील रहिवाशी होते.
शिवाजी पाटील हे सावदे येथून मोटारसायकलीने धुळे येथे आपल्या मुलीला भेटण्यासाठी आलेले होते. भेटीनंतर काल (दि.२५) आपल्या सावदे गावी मोटारसायकलने परतत असताना सुरत- नागपूर महामार्गावरील फागणे (ता. धुळे) गावाजवळील पुलावर त्यांच्या मोटारसायकल (एम. एच.५४. ए.०९८५) अपघात झाला. यात शिवाजी पाटील हे गंभीर जखमी झाले. त्यांना तत्काळ उपचारासाठी दाखल करण्यात आले होते. मात्र उपचार सुरू असतानाच त्यांची प्राणज्योत मालवली. त्यानंतर त्यांचा मृतदेह त्यांच्या सावदे गावी नेण्यात येऊन त्याठिकाणी काल सायंकाळी त्यांच्यावर शोकाकूल वातावरणात अंत्यसंस्कार करण्यात आले. त्यांच्या पश्चात पत्नी, एक भाऊ, मुलगी आणि मुलगा असा परिवार आहे.
शिवाजी पाटील हे त्यांच्या पत्नी छायाबाई पाटील यांच्यासममवेत धुळ्याला आलेले होते. मात्र परततांना पावसामुळे त्यांनी पत्नीला बसने जायला सांगीतले. त्यानुसार छायाबाई या बसने निघाल्या होत्या. त्यानंतर धुळ्याकडून परततांना फागणे गावाजवळ शिवाजी पाटील यांच्यावर काळाने घाला घातला. शिवाजी पाटील यांच्या पत्नी छायाबाई पाटील या सावदे गावाच्या पोलिस पाटील आहेत.