नशिराबाद (प्रतिनिधी) टोलनाक्याजवळ आज पहाटे सहा वाजेच्या सुमारास झालेल्या भीषण अपघातात पाच जण जागीच ठार झाले. तर सहा जण जखमी झाले आहेत.
बुधवारी फैजपूर येथे जनावरांचा बाजार भरतो. याठिकाणी जळगाव येथून बकर्‍या घेवून दोन बोलेरो पीकअप वाहने भुसावळच्या दिशेने जात होत्या. नशिराबाद टोल नाक्याजवळ समोरुन येणार्‍या भरधाव ट्रकने दोन्ही वाहनांना धडक दिली. या अपघातानंतर ट्रक उड्डाणपुलावरील पिलरला धडकला. या अपघातात दोन्ही पिकअप वाहनांचा चक्काचूर झाला. तर बोलेरो वाहनातील प्रवासी पुलाखाली फेकले गेल्याने गंभीर जखमी झालेत. यात चौघे जागीच ठार झाले तर एकाचा उपचारादरम्यान रुग्णालयात मृत्यू झाला. दरम्यान, ट्रक चालकाला डुलकी लागल्याने हा अपघात झाल्याचे बोलले जात आहे.
