छत्रपती संभाजीनगर (वृत्तसंस्था) शेतात काम करत असताना अचानक विजेच्या धक्क्याने एका शेतकरी तरुणाचा मृत्यू झाला. सिल्लोड तालुक्यातील पानस शिवारात शुक्रवारी (दि. २७) सकाळी ही दुर्दैवी घटना घडली. ईश्वर गजानन धनवट (वय २२), असे मयत शेतकरी तरुणाचे नाव आहे.
ईश्वर हा सकाळी पानस शिवारातील शेतात काम करत असताना अचानक ११ केव्ही खंडाळा फिल्टरवरील विद्युतवाहिनीचा कंडक्टर तुटून सिंगल फेस विद्युतवाहिनीवर पडला. यामुळे शॉटसर्किट झाल्याने विजेचा शॉक लागून ईश्वरचा मृत्यू झाल्याची माहिती त्याच्या नातेवाईकांनी दिली. दरम्यान प्राथमिक तपासणीनंतर ईश्वरचा मृतदेह नातेवाईकांनी गोळेगाव येथील महावितरणच्या सहाय्यक अभियंता कार्यालयासमोर आणला. ईश्वरचा मृत्यू हा महावितरणच्या हलगर्जीपणामुळे झाल्याचा आरोप यावेळी नातेवाईकांनी केला.
यावेळी तणावाची परिस्थिती निर्माण झाली होती. त्यामुळे अजिंठ्याचे सहायक पोलीस निरीक्षक प्रमोद भिंगारे यांच्यासह पोलीस कर्मचाऱ्यांनी धाव घेत नातेवाईकांची समजूत काढली. यानंतर ईश्वरचा मृतदेह त्याच्या गावी नेत त्याच्यावर अंत्यसंस्कार करण्यात आले. याप्रकरणी रात्री उशिरा अजिंठा पोलीसठाण्यात आकस्मिक मृत्यूची नोंद करण्यात आली. मयत ईश्वर याच्या पश्चात पत्नी कल्याणी, वडील आई, भाऊ असा परिवार आहे.
