धरणगाव (प्रतिनिधी) मैत्रिणीला फोन केल्याचा जाब विचारल्याच्या कारणावरून तिघांनी मिळून एका तरुणावर हल्ला केला असून, लाकडी काठी, फायटर व लाथाबुक्क्यांनी बेदम मारहाण करून त्याला गंभीर जखमी केल्याची धक्कादायक घटना धरणगाव शहरात घडली आहे. ही घटना १३ जून रोजी सायंकाळी घडली असून, याप्रकरणी १७ जून रोजी धरणगाव पोलिस ठाण्यात तिघांविरोधात गुन्हा दाखल करण्यात आला आहे.
पांडुरंग रवींद्र सोनवणे (वय २७, रा. लहान माळीवाडा, धरणगाव) असे मारहाणीत गंभीर जखमी झालेल्या तरुणाचे नाव आहे. तो आपल्या कुटुंबासह राहत असून शेती करून उदरनिर्वाह करतो. मिळालेल्या माहितीनुसार, संशयित विकी पवार याने पांडुरंग सोनवणे यांच्या मैत्रिणीला फोन केला होता. याचा जाब विचारण्यासाठी पांडुरंगने विकीला बोलावून घेतले.
१३ जून रोजी सायंकाळी साडेसात वाजता विकी पवार आपल्या दोन साथीदारांसह – नरेंद्र फुलपगार व अक्षय महाजन (सर्व रा. धरणगाव) – धरणगाव रेल्वे स्थानकाजवळ आला. तेथे या तिघांनी पांडुरंगला लाकडी काठी, फायटर व लाथाबुक्क्यांनी जबर मारहाण केली. अचानक झालेल्या या हल्ल्यामुळे पांडुरंग गंभीर जखमी झाला असून त्याच्यावर उपचार सुरू आहेत.
या प्रकारानंतर पांडुरंगने दिलेल्या तक्रारीवरून धरणगाव पोलीस ठाण्यात १७ जून रोजी दुपारी १ वाजता विकी पवार, नरेंद्र फुलपगार व अक्षय महाजन या तिघांविरोधात संबंधित कलमांखाली गुन्हा दाखल करण्यात आला आहे. याप्रकरणी पुढील तपास पोलीस कॉन्स्टेबल चंद्रकांत पाटील करीत आहेत.
