बोदवड (प्रतिनिधी) तालुक्यातील भानखेडा ते बोदवड रोडवर मोटार सायकल अडवत चाकूच्या धाकावर तरुणाला लुटल्याची धक्कादायक घटना घडली आहे. या प्रकरणी बोदवड पोलिसात एकाविरुद्ध गुन्हा दाखल करण्यात आला आहे.
या संदर्भात अधिक असे की, सचिन सुनील सोनवणे (वय २३) हे तालुक्यातील भिलवाडा येथे वास्तव्यास आहेत. दि. १० जानेवारी रोजी रात्री साडेआठ वाजता ते आपल्या मोटर सायकलने भानखेडा ते बोदवड रोडने घरी जात होते. यावेळी वसंता अशोक सोनवणे (रा.भिलवाडा) याने त्याच्या हातातील काठी सचिन यांच्यावर उगारुन त्यांची मोटरसायकल रोडवर अडवली. यानंतर चाकूने मारण्याची धमकी देत त्यांच्या खिशातील १५०० रुपये जबरदस्ती काढून घेतले आणि तेथून पळ काढला. तसेच पळ काढत असतांना या घटनेबाबत कोणाला काही सांगितले तर तुला जिवंत सोडणार नाही, अशी धमकी दिली. या प्रकरणी जबरी चोरीचा गुन्हा दाखल झाला असून पुढील तपास सहायक पोलीस निरिक्षक अंकुश जाधव हे करीत आहेत.
