धरणगाव (प्रतिनिधी) शहरालगत असलेल्या कृषी उत्पन्न बाजार समितीजवळ शेतमजूर महिलांना शेतात नेणाऱ्या वाहनाला अपघात झाल्याची घटना आज सकाळी घडली. या अपघातात १ महिला जागीच ठार तर ७ महिला आणि चालक जखमी झाल्याचे प्राथमिक माहिती समोर आली आहे.
आज सकाळी साडेआठ वाजेच्या सुमारास झायलो कारमधून काही मजूर महिलांना शेतात नेण्यात येत होते. कृषी उत्पन्न बाजार समितीच्या पुढे एका ठिकाणी कार अचानक पलटी झाली. या अपघातात कारमधील बसलेले सर्व जण कमी अधिक प्रमाणात जखमी झाले आहेत. दरम्यान, धरणगाव वैद्यकीय रुग्णालयातून मिळालेल्या माहितीनुसार चंद्रकलाबाई महाजन यांचा मृत्यू झाला आहे. तर निनाबाई महाजन, सुमन महाजन, माधुरी महाजन, जिजाबाई महाजन, स्वाती महाजन, ढगूबाई महाजन, महेंद्र पाटील हे जखमी आहेत. सर्व जखमींना जळगाव येथे पुढील उपचारासाठी रवाना करण्यात आले आहे.
