धरणगाव (प्रतिनिधी) येथील शतकोत्तर पी.आर.हायस्कूलमध्ये यंदा दहावीच्या परीक्षेत ९४.६० टक्के गुण मिळवून प्रथम येण्याचा मान पटकवणाऱ्या पूर्वा दत्तात्रय केले या विद्यार्थिनीने वर्षभर कुठलाही ट्युशन क्लास लावलेला नव्हता फक्त शाळेतील शिक्षकांनी शिकवलेला भाग आणि घरी केलेला नियमित अभ्यास याच भरवशावर तिला हे यश मिळाले म्हणून आपल्या यशाचे श्रेय तिने शाळेला आणि शिक्षकांना दिले आहे.
धरणगावच्या वाणी गल्लीतील रहिवासी असलेल्या पूर्वाचे वडील श्री. दत्तात्रय केले हे अर्बन बँकेचे सेवानिवृत्त चतुर्थ कर्मचारी आहेत.घरची परिस्थिती जेमतेम असूनही त्यांनी आपल्या मुलाला इंजिनिअरींगचे शिक्षण दिले. पूर्वासाठी महागडी क्लासची फी ते भरू शकत नव्हते. आपल्या घरची परिस्थिती ओळखून पूर्वानेही शाळा आणि घरी अभ्यास करून यशामध्ये ट्युशन क्लासची गरज नसते हे सिद्ध करून दाखवले. म्हणून कोणत्याही ट्युशन क्लासेसच्या गुणवंत विद्यार्थ्यांच्या बॅनरवर पूर्वाचा फोटो दिसणार नाही.
‘पूर्वा ही पहिली पासून आमची विद्यार्थिनी आहे.वक्तृत्व, निबंध, चित्रकला अशा अनेक उपक्रमात तिला सातत्याने बक्षीसे मिळाली आहेत.तिने उत्तम यश संपादन करुन शाळेचे आणि आई वडीलांचे नाव रोशन केले आहे,’ असे गौरवोद्गार मुख्याध्यापक डॉ. संजीवकुमार सोनवणे यांनी काढले आहेत. शाळेतर्फे पूर्वाचा सत्कार करण्यात आला. १९९७ च्या बॅचच्या माजी विद्यार्थ्यांतर्फे तिला ५० ग्रॅम चांदीचे पदक आणि विविध संघटनांतर्फे रोख बक्षिसे देऊन गौरविण्यात येणार आहे. पूर्वाला अवकाश संशोधनात करियर करायचे असून ती आता पुण्यात शिक्षण घेणार आहे.
