अमळनेर (प्रतिनिधी) बँकेपासून घरापर्यंत पाठलाग करत दोन दुचाकीस्वारांनी एकाचे 9 लाख रुपये हिसकावून नेल्याची घटना समोर आली आहे. ही घटना 10 रोजी 12.30 वाजेच्या सुमारास शहरात घडली.
याबाबत अधिक माहिती अशी की, शहरातील भोईवाडा येथील रहिवासी बापू शिंगाणे हे नगरपालिकेचे सेवानिवृत्त कर्मचारी असून त्यांची पत्नी सुरेखा शिंगाणे यांच्यासह ते आयडीबीआय बँकेत गेले होते. बँकेतून ९ लाख रुपये काढल्यानंतर त्यांनी ते पिशवीत नीट गुंडाळून पिशवी दुचाकीला टांगली. तसेच ती पिशवी मांडीवर ठेवून ते घराकडे निघाले. घराजवळ दुचाकी थांबवली असता काळ्या रंगाच्या दुचाकीवर दोन व्यक्ती आले आणि त्यांनी पैशांची पिशवी हिसकावून कसाली डीपीकडे पळ काढला. आजूबाजूच्या लोकांनी त्यांचा पाठलाग करण्याचा प्रयत्न केला, मात्र ते पळून जाण्यात यशस्वी झाले. दरम्यान, या घटनेचे वृत्त कळताच अप्पर पोलीस अधीक्षक कविता नेरकर, डीवायएसपी भाऊसाहेब घोलप, पोलीस निरीक्षक विकास देवरे, पीएसआय नामदेव बोरकर, मंगल भोई, विनोद संदानशिव, अमोल पाटील, नितीन कापडणे, रवींद्र पाटील, पूनम हटकर यांनी घटनास्थळी भेट दिली. या प्रकरणी बापू शिंगाणे यांच्या फिर्यादीवरून अमळनेर पोलीस ठाण्यात गुन्हा दाखल करण्यात आला आहे. या घटनेचा तपास पोलीस निरीक्षक विकास देवरे हे करत आहेत.
