नागपूर (वृत्तसंस्था) राज्याचे माजी गृहमंत्री अनिल देशमुख यांच्यासमोरच्या अडचणी कमी होण्याची चिन्ह नाहीत. ईडी आणि सीबीआयनंतर आता आयकर विभागाने अनिल देशमुख यांच्या घरांवर छापे टाकले आहेत. अनिल देशमुख यांच्या नागपूर इथल्या घरी आज सकाळी ११.३० च्या दरम्यान आयकर विभागाने झाडाझडती घेतली.
माजी गृहमंत्री अनिल देशमुख यांच्या घरावर छापेमारी करण्यात आली आहे. सकाळी ११.३० वाजता आयकर विभागाच्या अधिकाऱ्यांनी ही छापेमारी केली. माजी गृहमंत्री अनिल देशमुख यांच्या नागपूर, मुंबई, तसंच त्यांच्या मालकीच्या कॉलेजवर आयकर विभागाने छापे ठाकले. नागपुरातील निवासस्थान, नागपूर जिल्ह्यातील काटोल येथील निवासस्थान, मुंबईतील ज्ञानेश्वरी निवासस्थान, NIT कॉलेजवर आयकर विभागाने छापा टाकून झाडाझडती केली. अनिल देशमुख सध्या नागपुरात नाहीत. यापूर्वी दोन वेळा ईडी आणि सीबीआयने धाडी टाकल्या होत्या. आता दिल्ली आणि मुंबई येथील आयकर विभागाच्या अधिकाऱ्यांनी धाडी टाकून चौकशी सुरु केली आहे.
काय आहे प्रकरण?
मुंबईचे माजी पोलीस आयुक्त परमबीर सिंग यांनी अनिल देशमुख यांच्यावर १०० कोटी रुपयांच्या वसुलीचे आरोप केले होते. याप्रकरणी परमबीर सिंग यांनी मुख्यमंत्र्यांना पत्रही लिहिलं होतं. सचिन वाझे आणि अन्य काही पोलीस अधिकाऱ्यांना देशमुख यांनी १०० कोटी रुपयांच्या वसुलीचं टार्गेट दिलं होतं, असा आरोप परमबिर सिंह यांनी या पत्रात केला होता. मुंबईत १७५० बार आणि रेस्टॉरंट आहेत, आणि प्रत्येकाकडून २ ते ३ लाख रुपये घेतले तरी महिन्याला ४० ते ५० कोटी वसूल होतील, असा आरोप सिंह यांनी या पत्रात केला होता. या आरोपांनंतर अनिल देशमुख यांना गृहमंत्रीपदाचा राजीनामा द्यावा लागला होता.
