नंदुरबार (वृत्तसंस्था) तक्रारदारांसह त्यांच्या साथीदारांवरील नवापूर तहसील कार्यालयातील प्रतिबंधात्मक कारवाई थांबवण्यासाठी तीन हजारांची लाच स्वीकारताना खाजगी पंटराला नंदुरबार एसीबीने लाच स्वीकारताच मंगळवारी दुपारी दिड वाजेच्या सुमारास नवापूर शहरातून अटक केली. हनू उर्फ अनक रामा वळवी (32, सोनारे दिगर, ता.नवापूर, जि.नंदुरबार) असे अटकेतील आरोपीचे नाव आहे. दरम्यान, या सापळ्यानंतर तहसील कार्यालयातील वरीष्ठांच्या अडचणीत वाढ होण्याची शक्यता नाकारता येत नाही.
असे आहे लाच प्रकरण
भादवडच्या 35 वर्षीय तक्रारदारासह 13 जणांवर गुन्हा दाखल असून त्यांच्याविरोधातील नवापूर तहसील कार्यालयातील प्रतिबंधात्मक कारवाई थांबवण्यासाठी संशयित अनक वळवी याने प्रत्येकी एक हजारांप्रमाणे 13 हजारांची लाच मागितली मात्र दहा हजारांवर 9 नोव्हेंबर रोजी तडजोड झाली व सात हजार रुपये आगाऊ स्वीकारण्यात आले. मंगळवार, 21 रोजी तीन हजारांची लाच स्वीकारताना वळवी यास नंदुरबार एसीबीच्या पथकाने अटक केली.
यांनी केला सापळा यशस्वी !
हा सापळा नंदुरबार एसीबीचे पोलिस उपअधीक्षक राकेश चौधरी यांच्या मार्गदर्शनाखाली पोलिस निरीक्षक समाधान वाघ व पोलिस निरीक्षक माधवी वाघ, हवालदार विलास पाटील, अमोल मराठे, देवराम गावीत, संदीप नावाडेकर, हवलादार विजय ठाकरे, ज्योती पाटील, जितेंद्र महाले आदींच्या पथकाने यशस्वी केला.
