चंदीगड (वृत्तसंस्था) हरयाणातील रोहतकमध्ये एक हैराण करणारी घटना समोर आली आहे. इथे एक नवरी लग्नानंतर सासरी जात असताना रस्त्यात तिच्यावर गोळी झाडण्यात आली. ही गोळी तिच्या पुर्वीच्या प्रियकराने झाडली असल्याची माहिती आहे. दरम्यान, जखमी नवरीला पीजीआय रोहतकच्या ट्रामा सेंटरमध्ये भर्ती केलं आहे. नवरीची प्रकृती गंभीर असून पोलीस सध्या प्रकरणाचा तपास करत आहेत.
घटनेची माहिती मिळताच पोलीस घटनास्थळी दाखल झाले आणि प्रकरणाचा तपास सुरू केला. सांपला गावात राहणाऱ्या तरुणीचं भाली आनंदपूर गावातील एका युवकासोबत लग्न झालं होतं. शुक्रवारी पाठवणीनंतर नवरी आपल्या सासरी निघाली होती. कार नवरदेवाचा भाऊ सुनिल चालवत होता. रात्री सुमारे बारा वाजता गावातील शिव मंदिराजवळ पोहोचताच मागून एका इनोव्हा कारमध्ये तिघे आरोपी आले. त्यांनी गाडीला ओव्हरटेक करत कार थांबवली आणि नवरीला गोळी मारली. हल्लेखोरांनी नवरदेवाच्या भावाची सोन्याची साखळीही हिसकावून घेतली आणि तिथून पळ काढला.
मिळालेल्या माहितीनुसार, हा हल्ला नवरीचा प्रियकर आणि त्याच्या साथीदारांनीच घडवून आणला. पोलिसांनी नामांकित आरोपींविरुद्ध गुन्हा दाखल करून त्यांचा शोध सुरू केला आहे. तपासात पोलिसांना असंही समजलं की हल्लेखोर सांपला येथूनच वधूच्या गाडीचा पाठलाग करत होते. मात्र वधू सासरच्या गावी पोहोचताच त्यांनी हा हल्ला केला. घटना घडल्यानंतर हल्लेखोरांनी हवेत गोळीबार करून घटनास्थळावरून पळ काढल्याचे घटनास्थळी उपस्थित लोकांचं म्हणणं आहे. या घटनेनंतर गावात दहशतीचे वातावरण निर्माण झालं आहे.
