सोलापूर (वृत्तसंस्था) कोरोना संसर्गाच्या पार्श्वभूमीवर विनापरवाना सभा, मोर्चे, आंदोलन करण्यावर बंदी घालण्यात आली आहे. तरीही विनापरवाना केंद्र सरकारच्या विरोधात आंदोलन केल्याप्रकरणी आमदार प्रणिती शिंदे यांच्यासह कार्यकर्त्यांवर गुन्हा दाखल करण्यात आला आहे.
आमदार प्रणिती शिंदे यांच्या नेतृत्वात इंधन आणि गॅस सिलेंडर सह जीवनावश्यक वस्तूंच्या दरवाढीवरून केंद्र सरकारविरोधात आंदोलन करण्यात आले होते. मात्र आंदोलनाला परवानगी नसल्यामुळे पोलिसांनी गुन्हा दाखल केला आहे. आमदार प्रणिती शिंदे, माजी आमदार सिद्धाराम म्हेत्रे, काँग्रेस जिल्हाध्यक्ष धवलसिंह मोहिते-पाटील, शहराध्यक्ष प्रकाश वाले यांच्यावरही गुन्ह्याची नोंद करण्यात आली आहे.
सोलापुरात विकासाच्या नावाने बोंब – प्रणिती शिंदे
सोलापूर शहर उत्तरमध्ये विकासाच्या नावाने बोंब असून, सोलापूर महापालिकेत गेल्या चार वर्षांपासून भाजपची सत्ता आहे. चार वर्षांपासून अनागोंदी कारभार सुरू आहे, असा हल्लाबोल प्रणिती शिंदे यांनी काही दिवसांपूर्वी केला होता. भ्रष्टाचार, अपुरा आणि आठ दिवसाआड पाणी पुरवठा, चुकीच्या पद्धतीने होत असलेली कामे, मोदी सरकारकडून रोजच होत आलेली पेट्रोल, डिझेल, गॅस सिलेंडर, खाद्य तेलाचे दरवाढ, प्रचंड महागाई, कॉंग्रेस पक्षाने कोव्हिड काळात केलेली कामे हे सर्व जनतेपर्यंत पोहोचवून वस्तुस्थिती जनतेसमोर मांडून शहर उत्तर मध्ये संघटना मजबूत करण्याचे आवाहन काँग्रेस आमदार प्रणिती शिंदे यांनी केलं होतं.
