मुंबई (वृत्तसंस्था) उपमुख्यमंत्री देवेंद्र फडणवीस (Davendra Fadnavis) यांच्या पत्नी अमृता फडणवीस (Amruta Fadnavis) यांना एका फॅशन डिझायनर महिलेने आधी एक कोटी रुपयांची लाच देण्याची ऑफर केली. मात्र, अमृता फडणवीस यांनी या महिलेला हुसकावून लावल्यानंतर तिने त्यांना ब्लॅकमेल करण्याचा प्रयत्न केला. त्यामुळे अमृता यांनी अखेर पोलिसात गुन्हा दाखल केला आहे. या प्रकरणाचे आज विधानसभेत पडसाद उमटले. सदस्यांनी प्रश्न उपस्थित करताच फडणवीस यांनी या घटनेची सविस्तर माहिती सभागृहाला दिली.
राज्याचे विरोधी पक्षनेते अजित पवार यांनी विधानसभेत या प्रकरणाबाबत प्रश्न मागताच देवेंद्र फडणवीस यांनी याबाबत अनेक धक्कादायक खुलासे केले. देवेंद्र फडणवीस यांच्या माहितीनंतर मलबार हिल पोलिसांचे पथक उल्हासनगरमध्ये दाखल झाले होते. विधानसभेत देवेंद्र फडणवीस यांनी अनिल जयसिंघानिया नावाच्या व्यक्तीचे नाव घेतले होते. पोलिसांनी अनिल जयसिंघानिया यांच्या घरी पोहोचत त्यांच्या घराची झाडाझडती सुरु केली. यानंतर पोलिसांनी अनिक्षाला ताब्यात घेतले.
माझ्या पत्नीने या प्रकरणाचा एक एफआयआर दाखल केला आहे. तिच्यावर दबाव आणून माझ्यामाध्यमातून काम करून घेण्याचा प्रयत्न झाला. आधी पैशाची ऑफर दिली. नंतर ब्लॅकमेल करण्याचा प्रयत्न करण्यात आला. अनिल जयसिंघांनी नावाचा एक व्यक्ती गेल्या सात ते आठ वर्षापासून फरार आहे. त्याच्यावर 14 ते 15 गुन्हे आहेत. त्याची एक मुलगी आहे. शिकलेली आहे. हुशार आहे. ही मुलगी 2015-16च्या दरम्यान अमृताला भेटत होती. नंतर तिचं येणं बंद झालं. अचानक 2021मध्ये या मुलीनं माझ्या पत्नीला भेटणं सुरू केलं, असं देवेंद्र फडणवीस यांनी सांगितलं.
मागच्या सरकारने माझ्या वडिलांना सोडवण्याचे प्रयत्न सुरू केले होते. पण सरकार बदलल्याने ती प्रक्रिया थांबली. तुम्ही ते बंद केलं. म्हणून आम्हाला तुम्हाला ब्लॅकमेल करावं लागलं, असं या मुलीने सांगितलं. हे सांगताना त्यांनी काही बड्या नेत्यांची नावं घेतली. मी ती नावं घेणार नाही. मला राजकारण करायचं नाही. कारण अशा आरोपींवर किती विश्वास ठेवायचा हा सुद्धा एक प्रश्न आहे. पण प्रकरण गंभीर आहे. हे कुणाही बाबतीत घडू शकतं, असं फडणवीस म्हणाले.
या आरोपींनी काही व्हिडीओ पाठवले. राजकीय नेत्यांसोबतचे आमचे कसे संबंध आहेत हे दाखवण्यासाठी त्यांनी हे व्हिडीओ पाठवले. आमचे सर्वच पक्षातील नेत्यांसोबत ओळख आहे. तुम्ही मदत नाही केली तर आम्ही त्यांना ही माहिती देऊ, अशी ब्लॅकमेलिंग त्यांनी सुरू केली. आम्हाला ट्रॅपमध्ये अडकवण्याचा हा प्रयत्न होता, असंही ते म्हणाले.
