जळगाव (प्रतिनिधी) जिल्हा मराठा विद्या प्रसारक सहकारी समाज मर्यादित जळगाव या संस्थेची २०१८ पासून रखडलेली अध्यक्ष व उपाध्यक्ष पदाची निवडणूक प्रक्रिया गुरुवारी जिल्हा उपनिबंधक कार्यालयात पार पडली. यात अँड. विजय भास्करराव पाटील यांची अध्यक्षपदी तर हेमंत अमृतराव साळुंखे यांची उपाध्यक्षपदी बिनविरोध निवड झाली आहे.
संचालकांकडून नूतन अध्यक्ष व उपाध्यक्षकांचा पुष्पगुच्छ देवून सत्कार करण्यात आला. निवडणूक अधिकारी म्हणून सहाय्यक निबंधक विजयसिंह गवळी यांनी काम पाहिले. जळगाव जिल्हा मराठा विद्या प्रसारक सहकारी समाज मर्यादीत या संस्थेचे अध्यक्ष नरेंद्र भास्कराव पाटील यांचे २०१८ मध्ये निधन झाले होते. तर उपाध्यक्ष डी.डी.बच्छाव यांनी राजीनामा दिला होता. तेव्हापासून अध्यक्ष व उपाध्यक्ष पदाची निवडणूक रखडली होती. गेल्या काही दिवसात कोरोनामुळे ही निवडणूक लांबणीवर पडली होती. दरम्यान आगामी काळात सहकारी संस्थाच्या निवडणुका असल्याने मविप्र संस्थेच्या अध्यक्ष व उपाध्यक्ष पदाची निवडणूक व्हावी यासाठी अँड. विजय पाटील यांच्याकडून राज्य सहकार निवडणूक प्राधीकरण यांच्याकडे पाठपुरावा करण्यात आला. त्यानुसार राज्य सहकार निवडणूक प्राधीकरणाने अध्यक्ष व उपाध्यक्षांची निवडणुक घेण्याबाबतचे जिल्हा उपनिबंधकांना आदेश दिले. त्यानुसार गुरुवारी जिल्हा उपनिबंधक कार्यालयात निवडणूक अधिकारी सहाय्यक निबंधक विजयसिंह गवळी यांनी निवडणूक घेतली.
यावेळी अध्यक्ष पदासाठी अँड. विजय पाटील व उपाध्यक्षपदासाठी हेमंत साळुंखे यांचा एकमेव अर्ज आल्याने विजयसिंह गवळी यांनी दोघांची निवड झाल्याचे जाहीर केले. सर्वानुमते तसेच बिनविरोध दोघांची निवड झाली. यावेळी मविप्रचे संचालक मंडळ उपस्थित होते. संचालकांकडून नूतन अध्यक्ष व उपाध्यक्षकांचा पुष्पगुच्छ देवून सत्कार करण्यात आला. दरम्यान आगामी काळातील मविप्रची निवडणूक ही नूतन अध्यक्ष अँड. विजय पाटील व उपाध्यक्ष हेमंत साळुंखे यांच्या उपस्थितीत होणार आहे.
