नागपूर (वृत्तसंस्था) अभियांत्रिकीचे शिक्षण घेत असलेल्या अल्पवयीन मुलीवर बॉयफ्रेंडसह दोन सख्या भावांनी सामूहिक बलात्कार (Atrocities) केल्याची संतापजनक घटना घडली आहे. ही घटना जरीपटका पोलिस ठाण्याच्या हद्दीत घडली. याप्रकरणी पोलिसांनी बॉयफ्रेंड यश कांबळे (वय १९, रा. इंदोरा) याला अटक केली आहे.
पोलिसांनी दिलेल्या माहितीनुसार, मुलगी ही १७ वर्षांची आहे. ती अभियांत्रिकीचे शिक्षण घेते आहे. तर यश हा मजुरी करतो. एकाच वस्तीत राहत असल्याने तिची यशसोबत ओळख होती. ओळखीचे रूपांतर मैत्रीत नंतर प्रेमात झाले. दोघेही २०२० पासून संबंधात होते. दरम्यान, मुलीला दुसऱ्या युवकासोबत प्रेम झाले. यातून दोघांमध्ये भांडणे व्हायला लागली. यामुळे मुलगी यशला भाव देत नव्हती. या कारणाने यश चिडला होता. अधूनमधून तो मुलीच्या संपर्कात राहत होता. दोघांत बोलणे होत होते. १७ एप्रिलला यशने मुलीला घरी बोलावले. यशच्या घरी कुणी नव्हते. त्याने आधी मुलीशी शारीरिक संबंध प्रस्थापित केले. काही वेळातच याच भागात राहणारे यशचे मित्र ऋषिल आणि रक्षित दोघेही घरी आले. यशने मुलीला तुझे अश्लील व्हिडिओ असल्याचे सांगितले. ते व्हायरल करण्याची आणि दोघांना दाखविण्याची धमकी दिली. दोघांनीही यशच्या मदतीने तिच्यावर आळीपाळीने बलात्कार केला.
वैद्यकीय तपासणीनंतर भावांचा उलगडा
मुलीने २४ एप्रिल रोजी जरीपटका पोलिस ठाणे गाठून तक्रार दिली. पोलिसांनी आधी यशवर बलात्काराचा गुन्हा नोंदवला व अटक केली. मुलीची वैद्यकीय तपासणी करताना डॉक्टरांकडे तिने ऋषिल आणि रक्षित या दोघांची नावे घेतली. त्यामुळे घटनेच्या दिवशी तिघांचा सहभाग होता, असे पोलिसांना सांगितले. पोलिस निरीक्षक बाकल यांनी घटनेचे गांभीर्य लक्षात घेऊन इतर दोघांचा शोध सुरू केला आहे.
