पिंपरी-चिंचवड (वृत्तसंस्था) पतीने आपल्या पत्नीच्या प्रियकराची हत्या केल्याची घटना पिंपरी चिंचवडमधील हिंजवडी पोलीस ठाणे हद्दीतील बावधन येथे घडली. त्यानंतर मृतदेह भट्टीत टाकून जाळण्यात आला. पोलिसांची दिशाभूल करण्यासाठी आरोपींनी ‘दृश्यम’ चित्रपटासारखी परिस्थिती निर्माण करण्याचा प्रयत्न केला. मात्र, या हत्येप्रकरणी हिंजवडी पोलिसांनी तिघांना अटक केली आहे, तर एका अल्पवयीनाला ताब्यात घेतले आहे.
बावधन येथे राहणारा भरत चोरगे याचे एका महिलेसोबत अनैतिक संबंध होते. २१ ऑक्टोबर भरतनं महिलेला तिच्या मोबाईलवर दोन मिस कॉल दिले. त्यावेळी जवळ असलेला पती चिडला आणि त्यानं आपल्या पत्नी विचारणा केली. त्यानंतर आरोपी पतीनं महिलेला मारहाण करण्यास सुरुवात केली. मारहाण करताना महिलेनं घरातून पळ काढला. त्याचदरम्यान महिलेशी संपर्क न होत असल्यानं तिचा प्रियकर असलेला भरत चोरगे या महिलेला भेटण्यासाठी तिच्या घराजवळ आला. मात्र भरत तिथे आल्याचं समजताच आरोपीनं आपल्या दोन साथीदारांच्या मदतीनं त्याची धारदार शस्त्रानं वार करत हत्या केली. हत्या करुन भरतचा मृतदेह गाडीतून उरवडे गावात असलेल्या दारुच्या हातभट्टीमध्ये दिवस जाळला. त्यानंतर मृतदेह जाळल्यानंतर त्याची राख आणि इतर अवशेष हे घोटावडे परिसरातल्या नाला आणि नदीत टाकून पुरावे नष्ट केले. त्यानंतर आरोपी पती मध्य प्रदेशमध्ये पळून गेला.
भरत चोरगेच्या कुटुंबियांनी हिंजवडी पोलीस स्टेशनमध्ये तो बेपत्ता असल्याची तक्रार दाखल केली. त्याच दिवशी भरतची चप्पल त्याच्या आईला लंकेशच्या घराजवळ दिसली. त्यानंतर हिंजवडी पोलिसांनी तपास सुरु करुन लंकेशची चौकशी केली. चौकशीदरम्यान ही घटना समोर आली. सर्व आरोपींनी हत्येचा घटनाक्रम सांगितला असून मृत भरतला दारुच्या भट्टीमध्ये जाळलं. त्यावेळी त्याची हाडं आणि भरतच्या पायामध्ये काही वर्षांपूर्वी डॉक्टरांनी बसवलेला लोखंडी रॉड टाकून दिलेल्या ठिकाण देखील सांगितलं. पोलिसांनी तो लोखंडी रॉड हस्तगत केला आहे. पोलिसांनी पती लंकेश राजपूत उर्फ लंक्या, गोल्या उर्फ अरुण राजपूत, सचिन तानाजी राजपूत यांनी अटक केली आहे. तर एका अल्पवयीन मुलाला ताब्यात घेण्यात आलं आहे.
