रावेर (प्रतिनिधी) काँग्रेसने शुक्रवारी महाराष्ट्र प्रदेशाध्यक्षपदी नाना पटोले यांची निवड झाल्याची अधिकृत घोषणा केली आहे. प्रदेश कार्यकारणीत यावल रावेर विधानसभा मतदार संघाचे आमदार शिरीषदादा मधुकरराव चौधरी यांची महाराष्ट्र प्रदेश काँग्रेस समितीच्या उपाध्यक्षपदी नियुक्ती करण्यात आलीय.
प्रदेशाध्यक्ष पदी आपली निवड होणार याच खात्रीने गुरुवारी पटोले यांनी आपला विधानसभा अध्यक्ष पदाचा राजीनामा दिला. त्यानंतर संध्याकाळीच त्यांच्या नावाची घोषणा काँग्रेसकडून होणार हे निश्चित मानले जात होते. २४ तासानंतर काँग्रेस पक्षश्रेष्ठीनी यावर शिक्कामोर्तब केले. नाना पटोले यांच्या प्रदेश कार्यकारिणीत रावेर यावल विधानसभा मतदार संघाचे आमदार शिरीषदादा चौधरी यांची प्रदेश उपाध्यक्ष म्हणून नियुक्ती करण्यात आली आहे. खानदेशातून यासोबत धुळे येथील आमदार कुणाल पाटील यांनाही प्रदेश कार्याध्यक्षपदी नियुक्ती करण्यात आलेली आहे. काँग्रेसने जारी केलेल्या पत्रकानुसार, नाना पटोले यांना प्रदेशाध्यक्ष करत त्यांच्यासोबत ६ कार्यकारी अध्यक्ष आणि १० उपाध्यक्षांची सुद्धा निवड केली. यामध्ये माजी मुख्यमंत्री सुशील कुमार शिंदे यांच्या कन्या प्रणिती शिंदे यांना देखील मोठी जबाबदारी देण्यात आली आहे.
