जळगाव (प्रतिनिधी) – गॅस कटरच्या सहाय्याने चोरटे एटीएम मशिन कट करीत होते. दरम्यान, संबंधित बँक सिस्टीमला त्याचा अलर्ट गेला. त्यांनी लागलीच संबंधित पोलीस ठाण्यात कॉल करुन घडलेला प्रकार सांगितला. दरम्यान, पोलीस अंमलदाराने घटनेचे गांभीर्य लक्षात घेत लागलीच गस्तीवर असलेल्या पोलिसांना घटनास्थळी पाठविले. पोलीस येत असल्याचे समजताच चोरटे गॅस कटरचे साहीत्य तेथेच सोडून पसार झाल्याने चोरीचा प्रयत्न फसला. ही घटना मंगळवारी पहाटे पावणेपाच वाजेच्या सुमारास अजिंठा रोडवरील जळगाव टोल काट्याजवळ घडली. पोलिसांनी घटनास्थळावरून गॅस कटर जप्त केले आहे.
शहरातील राष्ट्रीय महामार्गावरील अजिंठा रस्त्यावर जळगाव टोलकाट्याजवळ स्टेट बँक ऑफ इंडियाचे एमटीएम असून त्याच्या आजूबाजूला भंगार साहित्याचे दुकाने आहेत. मंगळवार दि. २३ जून रोजी पहाटे पावणेपाच वाजेच्या सुमारास चोरट्यांनी एटीएममध्ये प्रवेश करून गॅस कटरच्या सहाय्याने मशीन कापण्यास सुरुवात केली. मात्र मशीनला झालेल्या छेडछाडमुळे बँकिंग सिस्टीममध्ये तसा संदेश गेला. संबंधित बँकेच्या अधिकाऱ्यांनी घडलेल्या प्रकाराबाबत लागलीच एमआयडीसी पोलीस ठाण्यात माहिती दिली. नाईट ड्युटीवर असलेले ठाणे अंमलदार चंद्रकांत पाटील यांनी घटनेचे गांभीर्य लक्षात घेत रात्रीच्या वेळी गस्तीवर असलेल्या कर्मचाऱ्यांना घटनास्थळी पाठविले.
पोलीसांची कुणकुण लागताच चोरटे पसार
घटनेची माहिती वरिष्ठांना दिल्यानंतर उपविभागीय पोलिस अधिकारी नितीन गणापुरे, पोलिस निरीक्षक बबन आव्हाड, पोहेकॉ प्रदीप पाटील, रामकृष्ण पाटील, रमेश चौधरी, किरण चौधरी हे घटनास्थळी पोहचले पोलिस येत असल्यीच कुणकुण लागताच एटीएम फोडीचा प्रयत्न करणारे चोरटे तेथून पसार झाले. त्यामुळे एटीएममधील रक्कम सुरक्षित राहिली आहे.
एका बाजूने कापली एटीएम मशिन
चोरट्यांनी एटीएम मशीन ठेवलेल्या ठिकाणी प्रवेश केल्यानंतर पुढील शटर उघडून बाजूने मशीन कापण्यास सुरुवात केली. त्या वेळी एक बाजू पुर्णपणे कापली गेली होती. त्याचवेळी पोलिस येत असल्याचे समजल्याने गॅस कटर घटनास्थळीच सोडून चोरटे पसार झाले. पोलिसांनी घटनास्थळाहून गॅस कटरसह गॅस हंडी व ऑक्सिजन सिलींडर जप्त केले आहे. दरम्यान, चोरी करणारे चोरटे हे तीन ते चार असल्याचा अंदाज पोलिसांनी व्यक्त केला. त्यातील दोघ बाहेर येणाऱ्या जाणाऱ्यांवर लक्ष ठेवून होते तर उर्वरीत दोघे एटीएम कापत होते. दरम्यान, पोलिसांकडून वेगवेगळ्या भागात त्यांचा शोध घेतला जात आहे.
गॅस कटर पेटवण्यासाठीची आगपेटी पोलिसांकडून जप्त
एटीएम मशिन कापण्यासाठी चोरट्यांनी आणलेले गॅस कटर पेटविण्यासाठी चोरट्यांनी आगपेटीचा वापर केला. दरम्यान, जी आगपेटी वापरली ती चोरटे एटीएम मशिनच्या की बोर्डवर पडलेली 3 पोलिसांना मिळून आली. पोलिसांनी ती आगपेटी हस्तगत केली आहे. दरम्यान, ती आगपेटी वेगळ्याच कंपनीची असून ती या परिसरारात न मिळणारी आहे. त्या आगपेटीवरुन चोरट्यांचा पोलिसांकडून कसून शोध घेतला जात आहे
