नवी दिल्ली (वृत्तसंस्था) दरवर्षी चांगला पाऊस पडावा यासाठी एका अनिष्ठ प्रथेचं पालन केलं जातं. या प्रथेबद्दल ऐकूनही कदाचित तुमच्या तळपायाची आग मस्तकात जाईल. ही प्रथा आहे मध्यप्रदेशातली. इथे इथे वरुण राजाला खुश करण्यासाठी अल्पवयीन मुलींना निर्वस्त्र करुन गावभर फिरवलं जातं.
समोर आलेल्या माहितीनुसार, दरवर्षी चांगला पाऊस पडावा यासाठी अल्पवयीन मुलींना निर्वस्त्र करुन त्यांच्या खांद्यावर एक काठी ठेवली जाते. या काठीला एक बेडूक बांधला जातो. अन् या मुली गावाला प्रदक्षिणा घालून देवळात जातात. त्यावेळी इतर महिला त्यांच्यामागे भजन गात चालत असतात. या महिला गावकऱ्यांकडून धान्यही गोळा करतात. स्थानिक मंदिरात पोहचल्यानंतर भंडाऱ्यासाठी या धान्याचा वापर केला जातो.
आजवर अनेकांनी या प्रथेविरोधात आवाज उठवला. परंतु ही प्रथा अद्याप बंद झालेली नाही. स्थानिक पोलीस अधीक्षक डी आर तेनीवार यांनी दिलेल्या माहितीनुसार या प्रकारावर प्रशासकिय कारवाई करण्यात अडचणी येत आहेत. कारण मुलींना निर्वस्र होण्यासाठी जबरदस्ती केली जात नाही. अन् झाली असेल तर त्याबाबत समोर येऊन कोणी तक्रारही करत नाही. संबंधित मुलींच्या कुटुंबीयांचाही या प्रथेत समावेश असतो. त्यामुळे केवळ प्रबोधन करुन त्यांना या अंधश्रद्धेपासून दूर करण्यासाठी प्रयत्न केले जाऊ शकतात.
