पिंप्री /धरणगाव धरणगाव/जळगाव (प्रतिनिधी) – घराच्या अर्थव्यवस्थेची खरी धुरीण म्हणजे महिला असून बचत गट हे घरासाठी दुसरी अर्थव्यवस्था आहे. महिलांनी स्थानिक व डिजिटल बाजारपेठ मिळवण्यासाठी प्रशिक्षणे घेवून उत्पादने दर्जेदार ठेवावीत, मिळालेल्या कर्जातून रोजगार निर्मिती, व्यवसाय वाढ व उत्पादनात नावीन्यता आणण्यासाठी वापर करावा. असे आवाहन करुन महिला गटांच्या उत्पादनांना थेट बाजारपेठ उपलब्ध करून देण्यासाठी जिल्ह्यात ११ ठिकाणी ‘बहिणाबाई मार्केट मार्ट’प्रकल्पासाठी 20 कोटींचा निधी मंजूर केला असून पिंप्री येथेही लवकरच बहिणाबाई मार्ट उभारणार असल्याची ग्वाही पाणीपुरवठा व स्वच्छता मंत्री तथा जिल्ह्याचे पालकमंत्री गुलाबराव पाटील यांनी दिली. ते पिंप्री येथे त्रिवेणी संगम महिला प्रभाग संघाच्या वार्षिक सर्वसाधारण सभेत ते बोलत होते.
त्रिवेणी संगम महिला प्रभाग संघात 31 ग्रामपंचायती आणि महिला बचत गटांच्या 32 ग्राम संघाचा समावेश आहे. यावेळी वर्षभरात केलेल्या कर्ज वाटपाचा आणि विनियोगाचा लेखाजोखा मांडला गेला.
याप्रसंगी जिल्हा ग्रामीण यंत्रणेचे प्रकल्प संचालक राजू लोखंडे यांनी सांगितले की, पालकमंत्र्यांच्या मार्गदर्शनाखाली जिल्हयात मागील दोन वर्षात 724 कोटींचे कर्ज वाटप केले असून जिल्हयात महिलांच्या सक्षमीकरणासाठी विविध उपक्रम राबवले जात आहे. तसेच महीला बचत गटांनी नाविन्यपूर्ण वैयक्तिक व्यवसायला प्राधान्य द्यावे. समाधान पाटील व उद्योग निरीक्षक एस. टी. लासुरकर यांनी केंद्र व राज्य शासनाच्या विवीध योजनांची माहिती विशद केली. उषाबाई गुरव आणि प्रतिभा पाटील यांनीही आपले मनोगत व्यक्त केले. यावेळी पालकमंत्री गुलाबराव पाटील यांनी बचत गटाच्या महिलांकडून साहित्य खरेदी केले.
कार्यक्रमाचे प्रास्ताविक तालुका अभियान व्यवस्थापक किरण महाजन यांनी केले. सूत्रसंचालन आर्थिक साक्षरता सखी ज्योती बडगुजर यांनी तर आभार समुदाय संसाधन व्यक्ती सारिका पाटील यांनी मानले.
यावेळी जिल्हा ग्रामीण विकास यंत्रणेचे प्रकल्प संचालक राजू लोखंडे, गटविकास अधिकारी किशोर वानखेडे, जिल्हा अभियान व्यवस्थापक हरेश्वर भोई, जिल्हा संसाधन व्यक्ती समाधान पाटील, तालुका अभियान व्यवस्थापक किरण महाजन, या प्रभाग संघाच्या अध्यक्षा सुवर्णा देसले, सचिव मालती बडगुजर, खजिनदार प्रतिभा पाटील यांच्यासह या जिल्हा परिषद गटातील 32 ग्राम संघाचे पदाधिकारी, केडर, समुदाय संसाधन च्या महिला मोठ्या संख्येने उपस्थित होत्या.
