मुंबई (वृत्तसंस्था) केंद्रीय मंत्री नितीन गडकरी यांनी एका लेखात बाळासाहेबांच्या आठवणी सांगितल्या आहेत. त्यावेळी बाळासाहेब ठाकरेंनी राज ठाकरेंकडे आग्रह धरला की, उड्डाण पुलाजवळ गडकरींना बोलव. त्यामध्ये, बाळासाहेबांसोबत काढलेल्या फोटोची आठवणही गडकरी यांनी सांगितलीय.
नितीन गडकरी यांनी इंडिया टुडेच्या अंकात प्रसिद्ध झालेल्या लेखात गडकरींनी बाळासाहेबांच्या आठवणी जागवल्या. यावेळी, त्यांनी दोन घटनांचा आवर्जुन उल्लेख केला आहे. राज ठाकरेंनी बाळासाहेबांच्या आयुष्यावर ‘चित्रचरित्र’ करायचे ठरवले. त्यात जुन्या आणि काही नव्या फोटोंचा संग्रह आहे. त्यावेळी फोटो काढताना बाळासाहेब ठाकरे राज ठाकरेंना म्हणालेत, उड्डाण पुलाजवळ गडकरींना बोलव. मी उड्डाण पुलाजवळ गेलो. तिथे आम्ही फोटोसाठी पोज दिली. माझ्या मनात ती आठवण आजही कायम आहे. माझ्या मनावर ती कोरली गेली आहे. एक सच्चे जननेते म्हणून बाळासाहेब ठाकरे माझ्या स्मरणात कायम राहतील. गडकरींनी लेखात म्हटले आहे की, मी बाळासाहेबांकडून सगळ्या गोष्टी आत्मसात करण्याचा माझ्या परीने प्रयत्न केला.
सार्वजनिक जीवनात मला त्या गोष्टी उपयुक्त ठरत आहेत. त्यांनी माझ्यावर पोटच्या मुलाप्रमाणे प्रेम केले. ते असे नेते होते जे एखादा प्रसंग आला तर धर्म, जात, पंथ, निष्ठा याच्याही पलीकडे जाऊन निर्णय घेऊ शकत होते. ती ताकद त्यांच्यामध्ये होती. आजवर अनेक महापुरुषांचे मार्गदर्शन घेण्याचे भाग्य मला लाभले आहे. शिवसेनाप्रमुख बाळासाहेब ठाकरे हे त्या दिग्गजांपैकीच एक होत. बाळसाहेब ठाकरे यांनी माझ्या मनावर, व्यक्तिमत्त्वावर आणि सार्वजनिक जीवनावर मोठा प्रभाव टाकला आहे. मी भूतकाळात डोकावून पाहतो तेव्हा स्वतःच्या मातीची गर्जना करणारा वाघच मला त्यांच्या रूपाने दिसतो. बाळासाहेब ठाकरे मला स्वर्गातूनही आशीर्वाद देत असतील याची मला खात्री आहे, अशी भावना त्यांनी व्यक्त केली.
