मुंबई (वृत्तसंस्था) राज्यात वारंवार होणाऱ्या हवामान बदलांमुळे आधीच बळीराजा वैतागला आहे. हवामान खात्याकडून देण्यात आलेल्या माहितीनुसार, तळकोकण आणि पश्चिम महाराष्ट्रातील काही भागांत बुधवारी पाऊस पडण्याची शक्यता आहे. त्यामुळे शेतक-यांना काळजी घेण्याचं आवाहन हवामान विभागानं केलं आहे.
तळकोकण आणि पश्चिम महाराष्ट्रात आज पावसाचा इशारा देण्यात आला आहे. सिंधुदुर्ग, कोल्हापूर इथे आज हलक्या सरी किंवा मेघगर्जनेसह पाऊस पडण्याची शक्यता आहे. तर सातारा, सांगली जिल्ह्यात उद्या हलक्या सरी आणि मेघगर्जनेसह पाऊस पडण्याची शक्यता आहे. मध्य महाराष्ट्र आणि भोवतालच्या प्रदेशात हवामानातल्या बदलामुळे काल राज्यभर ढगाळ वातावरण होते.
त्याचाच परिणाम म्हणून आज उद्या पावसाचा इशारा देण्यात आलाय. तसंच सिंधुदुर्ग, कोल्हापूर, सांगली जिल्ह्यात शुक्रवारीही पावसाची शक्यता आहे. गेले काही दिवस महाराष्ट्रातील विविध भागांत पावसाच्या सरी कोसळत असल्याने मुंबईसह कोकणपट्टय़ातील भागांतही ढगाळ वातावरण आहे. मळभ दाटल्यामुळे कडक उन्हापासून बचाव होतोय.
