पुणे (वृत्तसंस्था) दुचाकीला क्रेनची धडक बसून झालेल्या अपघातानंतर क्रेनचे चाक अंगावरून गेल्याने आजीसह नातीचा मृत्यू झाला. ही घटना शिक्रापूर (ता. शिरूर) येथील हिवरे रोडलगत शुक्रवारी सायंकाळी ७ वाजण्याच्या सुमारास घडली. मैनाबाई गुरुनाथ राठोड (वय ५५), शिवानी संदीप राठोड (वय दीड वर्षे, दोघे रा. वाबळेवाडी, विरोळेवस्ती, शिक्रापूर, ता. शिरूर, जि. पुणे; मूळ रा. कळमस, ता. आळंद, जि. गुलबर्गा, राज्य कर्नाटक) अशी अपघातात ठार झालेल्या दोघींची नावे आहेत.
याबाबत संदीप गुरुनाथ राठोड (वय ३१, रा. वाबळेवाडी, विरोळेवस्ती, शिक्रापूर) यांनी शिक्रापूर पोलीस ठाण्यात फिर्याद दिली आहे. पोलिसांनी क्रेनचालक लाल बाबू कुमार ऊर्फ भोला कुमार (सध्या रा. बी. यू. भंडारी, सणसवाडी) याच्या विरुद्ध गुन्हा दाखल केला आहे. याबाबत मिळालेली माहिती अशी की, हिवरे रस्त्याने गुरुनाथ राठोड व मैनाबाई राठोड हे दाम्पत्य त्यांच्या दीड वर्षीय शिवानी या नातीला घेऊन दुचाकीहून प्रवास करीत होते. यावेळी देवखल मळा येथे पाठीमागून भरधाव वेगाने आलेल्या क्रेनची (एम. एच. १२ टी एच ०३७२) राठोड यांच्या दुचाकीला धडक बसली असता दुचाकीहून तिघेही खाली पडले. तरीदेखील क्रेनचालक क्रेन घेऊन पुढे जाऊ लागला असताना क्रेनचे चाक मैनाबाई यांच्यासह दीड वर्षीय शिवानी या बालिकेच्या अंगावरून गेल्याने त्यांचा जागीच मृत्यू झाला. पुढील तपास पोलीस निरीक्षक प्रमोद क्षीरसागर यांच्या मार्गदर्शनाखाली पोलीस उपनिरीक्षक महेश डोंगरे व पोलीस शिपाई प्रतीक जगताप करत आहेत.
