जळगाव (प्रतिनिधी) बीएचआर घोटाळ्यातील संशयित आरोपी धरम साखलाचा पुणे कोर्टाने जामीन मंजूर केल्याचे वृत्त आहे. दरम्यान, यापूर्वी सुरज झंवरचा देखील मुंबई हायकोर्टाने जामीन मंजूर केला होता.
संशयित आरोपी धरम साकला याने पुणे न्यायालयात जामीन अर्ज दाखल केला होता. त्यानुसार 7 जून रोजी यावर सुनावणी झाली होती. त्यानंतर आज दि 9 रोजी जामीन मंजूर करण्यात आला आहे.
दरम्यान, धरम सांखला व सुजीत वाणी हे दोघे जण पतसंस्थेचे कर्मचारी होते. त्यांच्याकडे अकाउंट हँडल करण्याची जबाबदारी होती. असे असताना त्यांनी ठेवीदारांची दिशाभूल करून त्यांच्यात भीती पसरवली. खोटे कागदपत्र खरे असल्याचे भासवून ठेवीदारांचे नुकसान तर कर्जदारांचा फायदा करून दिला, असा दोघांवर आरोप होता.
बीएचआर पतसंस्थेत अवसायकाच्या काळात झालेल्या गैरव्यवहार प्रकरणी पुण्यातील डेक्कन, आळंदी व शिक्रापुर या तीन पोलीस ठाण्यांत गुन्हे दाखल आहेत. यातील डेक्कन पोलीस ठाण्यात रंजना घोरपडे यांनी दिलेल्या फिर्यादीवरुन दाखल गुन्ह्यात पोलिसांनी ८९ व्या दिवशी तपास पूर्ण करून अतिरीक्त सत्र न्यायाधीश एस. एस. गोसावी यांच्या न्यायालयात दोषारोपपत्र सादर करण्यात आले होते. यात सीए महावीर जैन, विवेक ठाकरे, धरम सांखला, कमलाकर कोळी व सुजित वाणी या पाच जणांविरुद्ध दोषारोप सादर ठेवण्यात आले होते.
मुख्य संशयित सूरज झंवरनंतर धरम सांखलाचा जामीन मंजूर झाल्यामुळे इतर आरोपींच्या देखील जामिनाच्या आशा पल्लवित झाल्या आहेत. दरम्यान, घोटाळ्यातील मुख्य संशयित सुनील झंवर आणि जितेंद्र खंडारे अद्यापही पोलिसांच्या हाती लागलेले नाहीत.
