जळगाव (प्रतिनिधी) बीएचआरमधून घेतलेले कर्ज हे सुरक्षित कर्ज आहे. तसेच त्याची परतफेड देखील नियमितची प्रक्रिया सुरु आहे. त्यामुळे माझ्या कर्जाची फाईल बँकेतून दुसरीकडे कशी गेली?, याची माहिती संबंधितांनाच असेल, अशी प्रतिक्रिया पारोळ्याचे लोकनियुक्त नगराध्यक्ष करण पवार यांनी ‘द क्लिअर न्यूज’ सोबत बोलतांना दिली आहे.
आर्थिक गुन्हे शाखेने रविवारी कोर्टात रिमांडनोटमध्ये आरोपी महावीर जैन याच्या कार्यालयीन झडतीमध्ये करण बाळासाहेब पाटील या कर्जदाराची साडेतीन कोटी रुपयांच्या कर्जाची मूळ फाईल मिळून आली. या फाईलचा ऑडीट रिपोर्टशी काहीएक संबंध नाही. तपासात असे निष्पन्न झाले आहे की, अवसायक जितेंद्र कंडारे हे महावीर जैन यांच्या कार्यालयामध्ये मोठया रकमेच्या कर्ज प्रकरणाच्या फाईल पाठवत होते. सदरची बाब सुध्दा महावीर जैन कडून तपासात निष्पन्न झाली आहे. तसेच यासाठी लागणारी ठेवीदारांची माहिती जुन्या सर्व्हरमधून बीएचआर कर्मचा-यामार्फत काढून अवसायक जितेंद्र कंडारे हे पूरवत होते, असल्याचे म्हटले होते. याच पार्श्वभूमीवर करण पवार यांच्याशी संपर्क साधला असता, त्यांनी सांगितले की, बीएचआरमधून घेतलेले कर्ज हे सुरक्षित कर्ज आहे. तसेच त्याची परतफेड देखील नियमितची प्रक्रिया सुरु आहे. त्यामुळे माझ्या कर्जाची फाईल बँकेतून दुसरीकडे कशी गेली?, याची माहिती संबंधितांनाच असेल. त्याबाबत मी कसं सांगू शकणार?, असे श्री. पवार यांनी स्पष्ट केले.
