जळगाव (प्रतिनिधी) बीएचआरचे चाळीसगाव शहरात मेजर कॉर्नर शॉपींग कॉम्पलेक्स येथील चार गाळ्यांमध्ये शाखा आहे. या शाखांचे खोटे करारनामे करून गाळे भाडे कराराने देण्याच्या प्रकरणी दाखल गुन्ह्यात बीएचआरचे संस्थापक प्रमोद भाईचंद रायसोनी व तत्कालीन मुख्य व्यवस्थापक सुकलाल शहादु माळी यांना न्यायालयाने साडेतीन वर्षे कारावासाची शिक्षा सुनावली आहे.
प्रमोद रायसोनीसह व्यवस्थपकाला ‘ही’ शिक्षा सुनावली
बीएचआरचे संस्थापक प्रमोद भाईचंद रायसोनी (वय ६१, रा. बळीरामपेठ) याला साडेतीन वर्षे सश्रम कारावास व २५ लाख रुपये दंड, दंड न भरल्यास २१ महिन्यांची साधी कैद तर तत्कालिन मुख्य व्यवस्थापक सुकलाल शहादु माळी (वय ५२, रा. तळेगाव, ता. जामनेर) याला साडेतीन वर्षे कारावास व २५ हजार रुपये दंड, दंड न भरल्यास तीन महिने साधी कैद अशी शिक्षा ठोठावण्यात आली आहे.
खोटे करारनामे
बीएचआरचे चाळीसगाव शहरात मेजर कॉर्नर शॉपींग कॉम्पलेक्स येथील चार गाळ्यांमध्ये शाखा आहे. ही दुकाने स्वत:च्या नावावर नसताना प्रमोद रायसोनी व त्याची पत्नी कल्पना यांनी ८ फेब्रुवारी २००६ रोजी मुख्य व्यवस्थापक माळी याच्या मदतीने खोटे करारनामे तयार केले. गाळे आपल्याच नावावर असल्याचे या कारारमान्यात नमुद केले. यानंतर या गाळ्यांचे डीपॉझीट म्हणून २५ लाख रुपये घेतले. गाळ्यांच्या मेंटेनेन्सपाेटी दरमहा पाच हजार रुपये घेतले. दरम्यान, २७ ऑक्टोबर २०१५ रोजी पतसंस्था अवसायनात गेली. तर ७ नोव्हेंबर २०१५ रोजी जितेंद्र कंडारे यांना अवसायक म्हणून नेमण्यात आले. यानंतर संस्थेच्या शाखा, डीपॉझीट, व्यवहार, डेडस्टॉक, आर्थिक व्यवहार तपासण्यात आले. यात चाळीसगाव शहरातील या चार गाळ्यांचे करारनामे खोटे असल्याचे आढळुन आले.
पतसंस्थेचे सभासद, ठेवीदारांची फसवणूक व अपहार केल्याचे निष्पन्न झाले होते
हे गाळे सुनिता जगन्नाथ वाणी यांच्याकडून कल्पना रायसोनी यांनी १४ जून २००६ रोजी ८ लाख २५ हजार रुपयात खरेदी केल्याचे आढळुन आले. तर संस्थेत हेच गाळे प्रमोद रायसोनीच्या नावे असल्याचे दाखवून पैसे काढून घेतल्याचे समोर आले. त्यामुळे रायसोनी दाम्पत्य व माळी यांनी संगनमत करुन पतसंस्थेचे सभासद, ठेवीदारांची फसवणूक व अपहार केल्याचे निष्पन्न झाले होते. त्यानुसार निपीक सुनिल गोपीचंद पाटील यांनी दिलेल्या फिर्यादीवरुन तीघांच्या विरुद्ध ८ डिसेंबर २०१६ रोजी शहर पोलिस ठाण्यात गुन्हा दाखल करण्यात आला. तपास पुर्ण झाल्यानंतर न्यायालयात दोषाराेप सादर करण्यात आले.
प्रमोद रायसोनी व सुकलाल माळी यांना शिक्षा ठोठावली
मुख्य न्यायदंडाधिकारी विनय मुगळीकर यांच्या न्यायालयात खटल्याची सुनावणी झाली. युक्तीवादाअंती न्यायालयाने प्रमोद रायसोनी व सुकलाल माळी यांना दोषी धरुन शिक्षा ठोठावली. सरकारपक्षातर्फे अॅड. रंजना पाटील यांनी काम पाहिले. पैरवी अधिकारी राजेश भावसार यांनी सहकार्य केलेे.
