जळगाव (प्रतिनिधी) तत्कालीन सरकारी वकील अॅड. प्रवीण चव्हाण यांच्यासह तिघांविरुद्ध दाखल खंडणीच्या गुन्ह्याच्या तपासासाठी विशेष तपास पथकाचे गठण करण्यात आले आहे. या पथकात दोन अधिकाऱ्यासह चार कर्मचाऱ्यांचा समावेश आहे.
नेमकं काय आहे प्रकरण ?
बीएचआरच्या दाखल (Bhr Scam) गुन्ह्यात झंवर परिवाराला मदतीच्या बदल्यात कोट्यावधीची लाच मागितल्याप्रकरणी तत्कालीन सरकारी वकील अॅड.प्रवीण चव्हाण (Ad.Pravin Chavhan), शेखर सोनाळकर यांच्यासह चाळीसगावच्या मद्य व्यापाऱ्याविरुद्ध गुन्हा दाखल करण्यात आला होता. सूरज सुनील झंवर (३२, रा. साई बंगला, सुहास कॉलनी, जळगाव) यांनी याबाबत डेक्कन पोलिस स्टेशनमध्ये १ कोटी २० लाखांची खंडणी मागितल्याची तक्रार दिली होती. त्यानुसार सुरुवातीला डेक्कन पोलिसांत गुन्हा दाखल करण्यात आला होता. या गुन्ह्यात अॅड. प्रवीण पंडित चव्हाण (रा. सुमंगल अपार्टमेंट, मोदीबाग, शिवाजीनगर, पुणे), शेखर मधुकर सोनाळकर (रा. नयनतारा अपार्टमेंट जळगाव), उदय नानाभाऊ पवार (रा. चाळीसगाव) हे संशयित आरोपी आहेत. त्यांच्याविरुद्ध भादंवि कलम १६६ २१३, ३८४, ३८५, ३८६, ३८८, ५०६, ३४, १२० ब अंतर्गत गुन्हा दाखल झाला आहे.
पुण्यातून जळगाव पोलिसांकडे गुन्हा वर्ग !
खंडणीची रक्कम चाळीसगाव येथे देण्यात आल्याने हा गुन्हा पुण्यातून जळगाव पोलिसांकडे वर्ग झाला. त्यानंतर या गुन्ह्याचा तपास स्थानिक गुन्हा शाखेमार्फत करण्याचा निर्णय झाला. त्यानंतर पोलिस अधीक्षक एम. राजकुमार यांनी या गुन्ह्याच्या तपासासाठी विशेष तपास पथकाचे (एसआयटी) गठण करण्यात आले आहे. या पथकात पोलिस निरीक्षक, उपनिरीक्षक, प्रत्येकी दोन हवालदार व नाईकांचा समावेश आहे.
‘एसआयटी’ पथकात यांचा आहे समावेश !
विशेष तपास पथकात पोलिस निरीक्षक संदीप पाटील, उपनिरीक्षक दीपक जगदाळे, हे. कॉ. विजय पाटील, नरेंद्र वारुळे, नाईक जीवन पाटील व मनोज सुरवाडे यांचा समावेश आहे. या सहा जणांच्या पथकाकडून या गुन्ह्याचा तपास करण्यात येणार आहे.
सुनील झंवर यांचा जबाब नोंदवला !
या पथकाने गेल्या आठवड्यात फिर्यादीचे वडील सुनील झंवर यांना एक पत्र दिले. जबाब नोंदविण्याकामी हजर राहण्याविषयी पत्राद्वारे कळविण्यात आले. त्यानुसार दि. १ फेब्रुवारी रोजी झंवर यांचा जबाब एसआयटी पथकाने नोंदविला आहे. तसेच झंवर यांच्याकडून काही पुराव्यांसह दस्तऐवजही एसआयटीने ताब्यात घेतले आहेत. तर पुढील काही दिवसात आणखी काही जणांचे जबाब नोंदवले जाण्याची शक्यता वर्तवण्यात येत आहे.
बीएचआर प्रकरणात अॅड.प्रवीण चव्हाण, चाळीसगावच्या मद्य व्यापाऱ्यासह एकाविरुद्ध खंडणीचा गुन्हा दाखल !
