अमळनेर (प्रतिनिधी) – खासदारांच्या सभेचे चित्रीकरण करण्यासाठी दिलेल्या मोबाईलमधून तरुणीचे खासगी फोटो व्हिडीओ व्हायरल करणाऱ्या तरुणाविरुद्ध विनयभंगासह आयटी अॅक्ट अन्वये गुन्हा दाखल करण्यात आला आहे. निकेश उर्फ राज पाटील असे त्या तरुणाचे नाव आहे.
अमळनेर येथील स्वामींनारायण मंदिरासमोर खा. श्रीकांत शिंदे यांची २६ नोव्हेंबर २०२५ रोजी सभा होती. या वेळी एका तरुणीने आपला मोबाईल निकेश उर्फ राज पाटील याला चित्रीकरणासाठी दिला होता. त्यामुळे त्याला मोबाईलचा पासवर्ड ही देण्यात आला होता. त्यावेळी त्याने तरुणीच्या मोबाईलमधील खासगी व्हिडिओचे स्वतःच्या मोबाईलमध्ये चित्रीकरण करून घेतले. दरम्यान, जानेवारी महिन्यात अविनाश चौधरी याने तरुणीला सांगितले की, तुझा व्हिडीओ व्हायरल होत आहे. त्यावेळी तरुणीने कोणते व्हिडीओ असल्याचे विचारून खात्री केली. त्यावेळी तिच्या मोबाईल गॅलरीमधील व्हिडीओ एक तरुणाने केल्याचे चौधरी याला सांगितले. दरम्यान, सभेच्या फोटोंवरून निकेश उर्फ राजचा शोध घेऊन त्याच्या मोबाईलमधून ते व्हिडीओ डिलीट केले. तर, भीतीमुळे तरुणीने आपल्या आई, वडिलांना ही बाब सांगितली नाही. मात्र, १६ मे रोजी पुन्हा तो व्हिडीओ नीलेश भांडारकर यांच्या मोबाईलमध्ये आल्यानंतर त्यांनी पीडितेच्या वडिलांना बोलावून ही घटना सांगितली. त्यावेळी पीडितेची खात्री झाली की तो व्हिडीओ निकेश उर्फ राज पाटील यानेच केला आहे. त्यानंतर पीडितेने अमळनेर पोलीस ठाण्यात फिर्याद दिल्यावरून निकेश उर्फ राज पाटील याच्याविरुद्ध विविध कलमान्वये गुन्हा दाखल करण्यात आला असून तपास पो.नि. दत्तात्रय निकम करत आहेत.
कठोर कारवाई करणार !
या प्रकरणात काही नावे समोर आली असून लवकरच आरोपी आणि व्हिडीओ व्हायरल करणाऱ्यांना अटक करण्यात येईल. तसेच त्यांची गय न करता कठोर कारवाई केली जाईल.असे पोलिस निरीक्षक दत्तात्रय निकम यांनी सांगितले.
