भुसावळ (प्रतिनिधी) – शहरात बेकायदेशीररित्या वास्तव्यास असलेल्या एका बांगलादेशी महिलेचा भुसावळ बाजारपेठ पोलिसांनी पर्दाफाश केला असून बनावट भारतीय कागदपत्रांच्या आधारे ती गेल्या अनेक वर्षांपासून शहरात राहत असल्याची धक्कादायक बाब समोर आली आहे. या कारवाईमुळे शहरात एकच खळबळ उडाली असून बनावट कागदपत्रांचे रॅकेट पुन्हा चर्चेत आले आहे.
पोलिसांनी दिलेल्या माहितीनुसार, फरीदा बेगम मोहम्मद खान (वय ४२, रा. भीमकाठी, ता. नाझीरपूर, जि. पीरोजपुर, बांगलादेश) असे संशयित महिलेचे मूळ नाव आहे. भारतात आल्यानंतर तिने जस्मिन बी मोहम्मद खान या नावाने भुसावळातील दीनदयाल नगर परिसरात वास्तव्य सुरू केले होते. प्राथमिक चौकशीत संशयिताने २००९मध्ये एका दलालास ५ हजार रुपये देऊन बोटीच्या सहाय्याने नदीमार्गे बांगलादेशातून पश्चिम बंगालमध्ये बेकायदेशीर प्रवेश केल्याची कबुली दिली. त्यानंतर रेल्वेने ती भुसावळ येथे पोहोचल्याचे तपासात स्पष्ट झाले आहे. या प्रकरणी भुसावळ पोलीस बाजारपेठ पोलीस ठाण्यामध्ये गुन्हा क्रमांक २६५/२६ अन्वये इमिग्रेशन आणि परदेशी कायदा, २०२५ मधील कलम २१, २२ व २३ अंतर्गत गुन्हा दाखल करण्यात आला आहे. संशयित महिलेला बनावट कागदपत्रे उपलब्ध करून देणाऱ्या एजंट, दलाल आणि संबंधित व्यक्तींचा पोलीस शोध घेत आहेत. दरम्यान, संशयास्पद हालचाली किंवा बनावट कागदपत्रांच्या आधारे वास्तव्यास असलेल्या व्यक्तींबाबत नागरिकांनी तातडीने पोलिसांना माहिती द्यावी, असे आवाहन जळगाव व भुसावळ पोलिसांनी केले आहे.
मोबाईल तपासात उघड झाले धक्कादायक पुरावे
पोलिसांनी संशयिताकडून जप्त केलेल्या मोबाईलच्या तांत्रिक तपासात ८८० या बांग्लादेशी कंट्री कोडवरील क्रमांकांशी सातत्याने संपर्क, चॅटिंग आणि व्हिडिओ कॉलिंग झाल्याचे समोर आले. मोबाईलमध्ये संशयिताच्या जन्मदाखल्याची प्रतही आढळून आली.
मृत बहिणीच्या कागदपत्रांवर तयार केली भारतीय ओळख
तपासादरम्यान या महिलने तिच्या मृत बहिणीच्या नावावरील वीज बिल आणि इतर कागदपत्रांचा वापर करून स्वतःच्या नावाने रेशन कार्ड, आधार कार्ड, मतदान ओळखपत्र, पॅन कार्ड, बँक पासबुक आणि भारतीय पासपोर्ट तयार करून घेतल्याची गंभीर बाब उघड झाली आहे.
बनावट पासपोर्टवरून बांगलादेश दौरा
विशेष म्हणजे, बनावट भारतीय पासपोर्टच्या आधारे संशयित महिला मे २०२३ मध्ये बांग्लादेशात जाऊन पुन्हा भारतात परतल्याचा धक्कादायक खुलासा पोलिस तपासातून झाला आहे. त्यामुळे बनावट कागदपत्रे तयार करणाऱ्या एजंट आणि दलालांचे मोठे जाळे सक्रिय असल्याचा संशय व्यक्त केला जात आहे.
