मुंबई (वृत्तसंस्था) बॉलिवूडमधील ज्येष्ठ अभिनेते युसूफ हुसेन यांचे निधन झाले आहे. बॉलीवूड आणि टीव्हीचा प्रसिद्ध चेहरा युसूफ हुसैन यांच्या निधनाची माहिती देताना दिग्दर्शक हंसल मेहता यांनी त्यांना भावपूर्ण श्रद्धांजली वाहिली. हंसल यांनी युसूफ यांच्या निधनावर एक भावनिक पोस्ट शेअर करून तीव्र दु:ख व्यक्त केले आहे.
“मी शाहिद या चित्रपटाचे २ शेड्युल पूर्ण केले होते. पण काही कारणामुळे मी अडकलो होतो. मी अडचणीत सापडलो होतो. चित्रपट निर्माता म्हणून माझी कारकीर्द संपत आली होती. त्याचवेळी ते (युसूफ हुसैन) माझ्याजवळ आले. त्यांनी मला सांगितले की माझ्याकडे एक फिक्स्ड डिपॉझिट आहे. मला त्याचा काहीही उपयोग नाही. तू जर अडचणीत असशील तर…असे सांगतच त्यांनी एका चेकवर सही केली. यानंतर शाहिद चित्रपट पूर्ण झाला. ते माझ्या वडिलांसारखे होते,” अशी भावनिक पोस्ट हंसल मेहता यांनी लिहिली आहे.
त्यांच्या निधनानंतर बॉलिवूडमधील अनेक कलाकारांनी हळहळ व्यक्त केली आहे. बॉलिवूडमधील अनेक कलाकार, दिग्दर्शक यांच्या अनेकांनी सोशल मीडियावर पोस्ट शेअर करत शोक व्यक्त केला आहे. युसूफ हुसैन यांची कारकीर्द दीर्घकाळ गाजली. त्यांनी आतापर्यंत अनेक उत्कृष्ट चित्रपट आणि टेलिव्हीजन मालिकेत काम केले आहे.
