अहमदनगर (वृत्तसंस्था) कौटुंबिक वादातून बापाने स्वतःच्या मोठ्या मुलाचा गळा दाबून खून केला. नंतर धाकट्या मुलाच्या मदतीने त्याचा मृतदेह दगड बांधून बुरुडगाव रस्त्यावरील एकाडे मळ्यातील एका विहिरीत टाकल्याचा धक्कादायक प्रकार शुक्रवारी (दि. ३१) समोर आला. दि. ८ मे रोजी ही घटना घडली होती. तब्बल २३ दिवसांनी ही घटना पोलीस तपासात स्पष्ट झाली असून, पोलिसांनी मयताचे वडील व भाऊ या दोघांविरुद्ध खुनाचा गुन्हा दाखल करत दोघांना ताब्यात घेतले आहे.
गणेश अशोक एकाडे (वय ३१, रा. एकाडे मळा) असे मृताचे नाव आहे. कोतवाली पोलिसांनी त्याचे वडील अशोक लक्ष्मण एकाडे व भाऊ दिनेश अशोक एकाडे या दोघांना ताब्यात घेतले आहे. अशोक एकाडे यांनी दि. १० मे रोजी कोतवाली पोलीस ठाण्यात येऊन मुलगा गणेश बेपत्ता झाल्याची तक्रार नोंदवली होती. हेडकॉन्स्टेबल विक्रम वाघमारे व अंमलदार डाके याबाबत तपास करीत होते. तपासादरम्यान तक्रारदाराकडून प्रत्येक वेळी दिल्या जाणाऱ्या वेगवेगळ्या माहितीमुळे पोलिसांचा अशोकवर संशय बळावला. त्यादृष्टीने पोलिसांनी परिसरात माहिती घेतली असता, बापानेच मुलाला मारल्याची गोपनीय माहिती अंमलदार दीपक रोहकले यांना मिळाली. त्यानंतर अशोक व त्यांच्या धाकट्या मुलाला ताब्यात घेत कसून चौकशी केली. दि. ८ मे रोजी रात्री १०.३० च्या सुमारास घराच्या गच्चीवर मुलाचा गळा दाबून खून केल्याचे व धाकट्या मुलाच्या मदतीने मृतदेह विहिरीत नेऊन टाकल्याचे तपासात समोर आले. गणेश व त्याच्या वडिलांचे कायम वाद होत होते. त्यातूनच हा प्रकार घडल्याचे पोलिसांनी सांगितले.
खुनाचा उलगडा होताच पोलिसांनी एकाडे मळ्यातील विहिरीकडे धाव घेतली. पोलीस उपअधीक्षक अमोल भारती, पोलीस निरीक्षक प्रताप दराडे यांच्यासह कोतवाली पोलिसांचे पथक घटनास्थळी दाखल झाले. स्थानिक नागरिक व महापालिकेच्या अग्निशमन दलाच्या मदतीने रात्री उशिरा गणेशचा मृतदेह विहिरीतून बाहेर काढण्यात आला. या प्रकरणी हेडकॉन्स्टेबल विक्रम वाघमारे यांच्या फिर्यादीवरून पोलिसांनी अशोक एकाडे व दिनेश एकाडे या दोघांविरुद्ध खुनाचा गुन्हा दाखल केला असून, उपनिरीक्षक शीतल मुगडे तपास करीत आहेत
