पाळधी ता. धरणगाव (प्रतिनिधी) पालकमंत्री ना. गुलाबराव पाटील यांच्या घराबाहेरील व कार्यालयाबाहेरील आक्षेपार्ह लिखाणबाबत भाजप युवा मोर्चाच्या कार्यकर्त्यांवर कडक कारवाई करण्यात यावी, अशी मागणी शिवसेना विधानसभा क्षेत्रप्रमुख संजय लोटन पाटील यांनी पाळधी पोलिसांना एका निवेदनाद्वारे केली आहे. विशेष म्हणजे या पालकमंत्र्यांच्या घर आणि कार्यालयाबाहेर भाजपच्या कार्यकर्त्यांचा दारु पिऊन धिंगाणा घातल्याचाही आरोप करण्यात आला आहे.
शिवसेना विधानसभा क्षेत्रप्रमुख संजय लोटन पाटील यांनी पाळधी पोलिसांना दिलेल्या निवेदनात म्हटले आहे की, दि. १७ जानेवारी २०२२ रोजी मध्यरात्रीच्या सुमारास भाजप युवामोर्चाचे जिल्हाध्यक्ष श्रीकांत महाजन, उपजिल्हाध्यक्ष सचिन प्रभाकर पवार, निर्दोष नानाजी पवार युवामोर्चा तालुकाध्यक्ष धरणगाव, सरचिटणिस टोनी महाजन, सचिन पाटील, भुषण कंखरे, माजी तालुकाध्यक्ष विशाल पाटील साकरे, गोपाल पांडे सोनवद, योगेश ठाकरे, दिलीप माळी, कन्हैया रायपुरकर यांच्यासह आदी कार्यकर्त्यांनी घराजवळ व कार्यालयाजवळ येवून दारु पीऊन धिंगाणा केला. एवढेच नव्हे तर आक्षेपार्ह लिखाण करुन पालकमंत्री ना. गुलाबराव पाटील यांचा अवमान केलेला आहे. तसेच जळगाव जिल्हाधिकारी यांनी केलेल्या संचारबंदी काळाचे उल्लंघन करुन वरील प्रकार केलेला आहे. तरी त्यांच्यावर कडक कारवाई करण्यात यावी, अशी मागणी याद्वारे करण्यात आली आहे. या निवेदनावर मुकुंद नन्नवरे, भूषण महाजन, सुरेश नन्नावरे, सुभाष महाजन, दिलीप पाटील, संजय महाजन, कल्पेश कोळी यांच्या स्वाक्षऱ्या आहेत.
विद्यापीठ सुधारणा कायद्याचा निषेध
विधी मंडळात महाविकास आघाडीच्या सरकारने विद्यापीठ कायदा सुधारणा विधेयक मंजूर करण्यात आले आहे. या विधेयकाला राज्यात भाजपाकडून तीव्र निषेध व्यक्त करण्यात येत आहे. याचा निषेध म्हणून भाजपा युवा मोर्चाच्या पदाधिकाऱ्यांनी सोमवारी १७ जानेवारी रोजी मध्यरात्री १ वाजता जळगाव जिल्ह्याचे पालकमंत्री ना. गुलाबराव पाटील यांच्या घरासमोर गनिमी कावा पद्धतीने आंदोलन करत घरासमोर काळी रांगोळीने रांगोळी काढून अनोखे आंदोन करून निषेध व्यक्त केल्याचे वृत्त आज सकाळीच समोर आले होते.
