यवतमाळ (वृत्तसंस्था) बसमध्ये चढत असलेल्या एका प्रवासी महिलेच्या पर्समधून अज्ञात चोरट्यांनी तीन लाखाचे दागिने लांबवीत पळ काढल्याची शहरातील नवीन बसस्थानक परिसरात बुधवार, दि. ३ एप्रिलला दुपारच्या सुमारास घडली. या घटनेमुळे बसस्थानक परिसरात एकच खळबळ उडाली होती.
या प्रकरणी वैशाली जाधव (रा. कोळी खुर्द ता. घाटंजी) या महिलेने अवधुतवाडी पोलिस ठाण्यात तक्रार दाखल केली आहे. तक्रारीनुसार घाटंजी तालुक्यातील कोळी खुर्द येथील महिला वैशाली जाधव ही कुटुंबातील सदस्यांसह यवतमाळ येथील नवीन बसस्थानक येथे आर्णी जाण्याकरता बसची वाट बघत होती. काही वेळाने आर्णी बस लागताच बसमध्ये चढत असताना अज्ञात चोरट्याने त्यांच्या पर्समधील सोन्याचे मंगळसूत्र, अंगठ्या, सोन्याची चैन, सोन्याची नेकलेस, कानातले टॉप, सोन्याचे पेडल असा एकूण तीन लाख एक हजार रुपयाचा मुद्देमाल लंपास केला.
वैशाली जाधव यांच्या लक्षात ही बाब येताच महिलेने आरडाओरड केली. यावेळी परिसरातील नागरिकांनी धाव घेऊन पाहणी केली. मात्र तोपर्यंत चोरटे प्रसार होण्यात यशस्वी झाले होते. घटनेचे गांभीर्य लक्षात घेता अवधुतवाडी पोलिस ठाण्यात तक्रार देण्यात आली. या प्रकरणी पोलिसांनी अज्ञात चोरट्या विरोधात विविध कलमानुसार गुन्हे दाखल केले. या प्रकरणाचा पुढील तपास ठाणेदार मनोज केदारे यांच्या मार्गदर्शनाखाली अवधूत वाडी पोलिस करीत आहे.
