जळगाव (प्रतिनिधी) पत्नीपासून विभक्त राहणाऱ्या पतीने पत्नीच्या बनावट स्वाक्षरी करुन घराच्या कर्जावर १० लाख रुपये टॉपअप कर्ज घेऊन प्रतिभा योगेश पवार (वय ३१, रा. मालेगाव, ता. नाशिक) यांची फसवणुक केली. हा प्रकार त्यांनी एलआयसी हाऊसिंग फायनान्स कंपनीचे अधिकारी व एजंट यांच्याशी संगनमत करुन केल्याची तक्रार दाखल असून त्यानुसार जिल्हापेठ पोलीस ठाण्यात फसवणुकीची गुन्हा दाखल करण्यात आला आहे.
मालेगाव येथील माहेर असलेल्या प्रतिभा योगेश पवार (वय ३१) यांचा विवाह योगेश पांडुरंग पवार यांच्यासोबत झाला होता. त्यांनी निमखेडी शिवारातील द्वारका नगर येथे घर घेतले होते. परंतु कौटुंबिक वादामुळे ते विभक्त राहत आहेत. घरासाठी त्यांनी एलआयसी हाऊसिंग फायनान्समधून १३ लाख रुपयांचे गृहकर्ज घेतले होते. या कर्जाला
प्रतिभा पवार या सहकर्जदार असून घर खरेदीसाठी त्यांनी माहेरुन ५ लाख रुपये आणले होते. परंतू त्यांचे कौटुंबिक वाद विकोपाला गेल्यामुळे त्यांनी न्यायालयात दावे दाखल केले आहेत. दरम्यान, पवार हे पत्नीसह मुलीचा कोणताही खर्च करीत नसल्यामुळे घरात वाटा असूनही ते राहू देत नाही.
चौकशीनंतर प्रकार उघडकीस योगेश पवार यांनी गृहकर्ज थकविल्याचा त्यांच्या पत्नीला संशय आल्यामुळे त्या दि. ११ जुलै २०२४ रोजी एलआयसी हाऊसिंग फायनान्स कंपनीत गेल्या होत्या. त्यांनी गृहकर्जाबाबत चौकशी केली असता, त्यांना घेतलेल्या गृहकर्जावर ऑगस्ट २०२३ मध्ये त्यांच्या पतीने टॉपअप कर्ज घेतल्याचे समजले.
टॉपअप कर्ज घेतल्याचे झाले उघड
प्रतिभा पवार या माहेरी असतांना त्यांच्या पतीने बनावट स्वाक्षरी करुन हे टॉपअप कर्ज घेतल्याचे उघड झाले. त्यांच्यावर कारवाईसाठी त्यांनी जिल्हापेठ पोलिसात तक्रार अर्ज दिला होता. त्याची चौक-शी झाल्यानंतर पोलिसांनी योगेश पांडुरंग पवार (रा. मालेगाव), एलआयसी हाऊसिंग फायनान्स एजंट तुषार प्रकाश बाविस्कर व तेथील अधिकाऱ्यांविरुद्ध फसवणुकीचा गुन्हा दाखल केला आहे.
