जळगाव (प्रतिनिधी) विटभट्टी व्यवसाय करायचा असेल तर ग्रामपंचायतीचा ना हरकत दाखला घ्यावा लागेल असे सांगून अमळनेर तालुक्यातील निम ग्रामपंचायतीचा ना हरकत दाखला देण्याच्या मोबदल्यात २५ हजाराची लाच स्वीकारणाऱ्या ग्रामसेवकाला जळगावच्या लाच लुचपत प्रतिबंधक विभागाने येथे रंगेहाथ पकडले. राजेंद्र लक्ष्मण पाटील (वय-५५, ग्रामसेवक, निम ग्रामपंचायत कार्यालय ता.अमळनेर जि.जळगाव वर्ग-३) असे लाच स्वीकारणाऱ्या ग्रामसेवकाचे नाव आहे.
अमळनेर तालुक्यातील निम ग्रामपंचायतच्या हद्दीत तक्रारदार यांचा सुमारे मागील ३० वर्षापासून निम ग्रामपंचायतीच्या हद्दीत विटभट्टीचा व्यवसाय आहे. तक्रारदार यांनी नियमाप्रमाणे तहसिल कार्यालय अमळनेर यांच्या नावे 6 हजार रुपये रॉयल्टी भरलेली आहे. तरी सुद्धा तक्रारदार यांना ग्रामसेवक राजेंद्र पाटील यांनी निम गावच्या ग्रामपंचायत हद्दीत जर विटभट्टी व्यवसाय करायचा असेल तर ग्रामपंचायतीचा ना हरकत दाखला घ्यावा लागेल असे सांगून निम ग्रामपंचायतीचा ना हरकत दाखला देण्याच्या मोबदल्यात निम ग्रामपंचायतीचे ग्रामसेवक राजेंद्र पाटील यांनी तक्रारदार यांच्याकडे पंचासमक्ष २७ हजार ५०० रुपयांची मागणी केली. यानंतर मागणी केलेल्या रक्कमेपैकी २५ हजाराची रोख रक्कम पंचासमक्ष निम ग्रामपंचायत कार्यालयात स्वतःस्विकारतांना त्यांना जळगावच्या लाच लुचपत प्रतिबंधक विभागाने रंगेहाथ पकडले. त्यांच्यावर मारवड पोलीस स्टेशन येथे गुन्हा दाखल करण्याची प्रक्रिया सुरु आहे. ही कारवाई एसीबीचे पोलिस उप अधीक्षक शशिकांत पाटील पीआय संजोग बच्छाव, पो.ना. ईश्वर धनगर, पो.कॉ.प्रदिप पोळ ,पो. कॉ. सचिन चाटे यांच्यासह पीआय एन.एन.जाधव, स.फौ.दिनेशसिंग पाटील, स.फौ.सुरेश पाटील, पो.हे.कॉ.सुनिल पाटील, पो.हे.कॉ.रविंद्र घुगे, म.पो.हे.कॉ. शैला धनगर, पो.ना.जनार्धन चौधरी, पो.ना.किशोर महाजन, पो.ना.बाळु मराठे, पो.ना.सुनिल वानखेडे, पो.कॉ.महेश सोमवंशी, पो.कॉ.राकेश दुसाने, पो.कॉ.प्रणेश ठाकुर, पो.कॉ.अमोल सुर्यवंशी यांनी केली.
