मुंबई (वृत्तसंस्था) मनसे अध्यक्ष राज ठाकरे (Raj Thackeray) यांचे विश्वासू नेते संदीप देशपांडे (Sandeep Deshpande) यांच्यावर आज सकाळी दादर येथे अज्ञात लोकांनी प्राणघातक हल्ला केल्याची खळबळजनक घटना घडली आहे. (Attack on MNS leader Sandeep Deshpande ) त्यांना तात्काळ हिंदुजा हॉस्पिटलमध्ये दाखल करण्यात आले आहे.
असा झाला हल्ला
अज्ञात लोकांनी दादर येथील शिवाजी पार्क येथे मॉर्निंग वॉकला गेलेले असताना देशपांडे यांच्यावर हल्ला झाल्याची माहिती आहे. संदीप देशपांडे हे आज नेहमीप्रमाणे मॉर्निंग वॉकला शिवाजी पार्कात आले होते. यावेळी मॉर्निंग वॉक करत असतानाच अचानक काही लोकांनी त्यांच्यावर हल्ला केला. त्यांना रॉड आणि स्टम्पने बेदम मारहाण करण्यात आली. अचानक झालेल्या या हल्ल्यामुळे संदीप देशपांडे प्रतिकार करू शकले नाही. अचानक झालेल्या हल्ल्यामुळे देशपांडे जखमी होऊन खाली कोसळले. देशपांडे यांच्यावर हल्ला झाल्यानंतर शिवाजी पार्कात मॉर्निंग वॉकला आलेल्या लोकांनी देशपांडे यांना वाचवण्याचा प्रयत्न केला. त्यामुळे हल्लेखोर पसार झाले. त्यानंतर स्थानिकांनी तात्काळ देशपांडे यांना हिंदुजा रुग्णालयात दाखल करण्यात आले आहे. देशपांडे यांची प्रकृती गंभीर नसल्याचं सांगितलं जात आहे. (Attack on Sandeep Deshpande Maharashtra Politics News)
फिल्डिंग लावून हल्ला केला
शिवाजी पार्कात मॉर्निंग वॉकला आलेल्या लोकांच्या सांगण्यानुसार चार ते पाच जण शिवाजी पार्कात तोंडाला मास्क लावून बसले होते. त्यांनी संदीप देशपांडे यांना एकटं पाहिलं. आणि त्यांच्यावर अचानक जोरदार हल्ला चढवला. संदीप देशपांडे कधीच एकटे मॉर्निंग वॉकला जात नाही. आम्ही चार पाच लोक त्यांच्यासोबत नेहमी असतो. पण आज ते एकटेच मॉर्निंग वॉकला गेले होते. त्यांना एकटं पाहूनच हा हल्ला करण्यात आला. कदाचित पाळत ठेवून हा हल्ला केला असावा. फिल्डिंग लावून झालेला हा हल्ला आहे. हा पूर्वनियोजित हल्ला होता हेच यातून स्पष्ट होतंय, असंही त्यांनी सांगितलं.
शिवाजी पार्क परिसरात तणावाची स्थिती
या हल्ल्यानंतर दादरच्या शिवाजी पार्क परिसरात तणावाची स्थिती आहे. घटनेमुळे मनसेचे स्थानिक कार्यकर्ते आक्रमक झाले आहेत. हा राजकीय हल्ला आहे. संदीप देशपांडे मनसेची भूमिका मांडायचे. इतर पक्षांविरोधात भूमिका घ्यायचे त्यामुळे संदीप देशपांडे यांना गप्प करण्यासाठी हा हल्ला केला गेल्याचा आरोप कार्यकर्ते करत आहेत. अद्याप या हल्ल्यामागे कोण आहेत याची माहिती समोर आली नाही. हल्ल्यात संदीप देशपांडे यांना मार लागला आहे. परंतु ते सुखरुप आहेत. उपचारासाठी त्यांना हिंदुजा रुग्णालयात दाखल केले आहे.
