जळगाव (प्रतिनिधी) शहरातील दूध फेडरेशन जवळील भाग्यश्री पेट्रोल पंपाजवळ शनिवारी २५ जानेवारी रोजी सकाळी १० वाजेच्या सुमारास एक भीषण अपघात घडला. यामध्ये विटा घेऊन जात असलेल्या ट्रॅक्टरला भरधाव डंपरने धडक दिल्याने एक जण जागीच ठार झाला, तर तीन जण गंभीर जखमी झाले. अपघातात मृत्यू झालेल्या व्यक्तीची ओळख अंकुश आत्माराम भिल (वय २७, रा. डिकसाई ताम, जळगाव) अशी झाली आहे.
घटना अशी घडली की, ट्रॅक्टर क्रमांक एमएच १९ एएन २९०६ विटा घेऊन जात असताना, डंपर नेहमीच्या वळणजवळ ओव्हरटेक करत असताना ट्रॅक्टरला कट मारला. यामुळे ट्रॅक्टर पलटी झाले आणि ट्रॅक्टरच्या खाली दबलेल्या अंकुश भिल यांचा जागीच मृत्यू झाला. त्याच्यासोबत असलेले सुनील मधुकर भिल (वय २२), गणेश भगीरथ भिल (वय १८), आणि शुभम सुखा भिल (वय २०) हे तिघेही गंभीर जखमी झाले. जखमींना तातडीने जिल्हा शासकीय वैद्यकीय महाविद्यालयात दाखल करण्यात आले आहे.
घटनेची माहिती मिळताच शहर पोलिसांनी घटनास्थळी धाव घेतली आणि डंपर ताब्यात घेतला. या घटनेच्या संदर्भात शहर पोलिसांनी गुन्हा दाखल करण्याचे काम सुरू केले आहे. मयत अंकुश भिल याच्या पश्चात आई-वडील, पत्नी, दोन मुले आणि एक मुलगी असा परिवार आहे. घरातील कर्ता पुरुष गेल्यामुळे त्यांच्या कुटुंबावर दुःखाचा डोंगर कोसळला आहे.
दरम्यान, स्थानिक रहिवाशांनी संताप व्यक्त करत या रोडवरून अवजड वाहतूक बंद करण्याची मागणी केली आहे. यापूर्वीही प्रशासनाला यासंदर्भात निवेदन दिले होते, पण त्यावर दुर्लक्ष केल्याचा आरोप नागरिकांनी केला आहे..
