मुंबई (वृत्तसंस्था) ईडीच्या अधिकाऱ्यांची मुंबईत तीन ठिकाणी झाडाझडती सुरू आहे. यात 2 ठिकाणी पत्राचाळ प्रकरणी म्हणजेच, संजय राऊत यांच्या प्रकरणात छापे टाकण्यात आले आहेत. तर नॅशनल हेराल्डप्रकरणी दिल्लीप्रमाणे मुंबईतही हेराल्ड हाऊसवर छापे टाकण्यात आले आहेत.
पत्राचाळ घोटाळ्याप्रकरणी शिवसेना खासदार संजय राऊत यांच्या अडचणींत आणखीन वाढ होण्याची शक्यता आहे. संजय राऊतांशी संबंधित दोन ठिकाणी ईडीची छापेमारी सुरू आहे. तसेच ईडीकडून या प्रकरणाशी संबंधित आणखी काही लोकांना समन्स पाठवण्यात आलं आहे, तर दोन ठिकाणी सर्च ऑपरेशन सुरू आहे. नेमक्या कोणत्या ठिकाणी ही छापेमारी सुरू आहे हे अद्यापही अस्पष्ट आहे. मात्र, ईडीची छापेमारी सुरू असल्याने ईडी कोठडीत असलेल्या संजय राऊतांच्या अडचणींत यामुळे वाढ होण्याची शक्यता आहे. संजय राऊत यांना 4 ऑगस्टपर्यंत ईडी कोठडी सुनावण्यात आली आहे. अशातच संजय राऊत यांची आज ईडी कोठडीत चौकशी होणार आहे.
दुसरीकडे ईडीच्या पथकाने दिल्ली आणि इतर ठिकाणाच्या नॅशनल हेराल्डच्या कार्यालयावर छापा टाकला आहे. ईडीचे अधिकारी नॅशनल हेराल्डच्या कार्यालयात उपस्थित असून शोध मोहीम सुरु आहे. या प्रकरणी यापूर्वी काँग्रेस अध्यक्षा सोनिया गांधी आणि राहुल गांधी यांचीही चौकशी करण्यात आली आहे. मनी लाँड्रिंग प्रकरणात हे छापे टाकण्यात आले आहेत. वृत्तसंस्थेने अधिकृत सूत्रांच्या हवाल्याने सांगितले की, ईडीने नॅशनल हेराल्डच्या कार्यालयावर तसेच १२ ठिकाणी छापे टाकले आहेत.
