जळगाव (प्रतिनिधी) नांदेड जिल्ह्यात मुंबई एनसीबीच्या पथकाने गांजाने भरलेला ट्रक जळगावला येणार असल्याचे स्पष्ट झाले असून ट्रकचा ड्रायव्हर मोबाईलवरून जळगावमधील एकाच्या संपर्कात असल्याची माहिती धक्कादायक माहिती समोर आली आहे. तर दुसरीकडे एनसीबीसह जळगाव पोलिसांसह ‘त्या’ व्यक्तीचा शोध घेत असल्याची माहिती विश्वसनीय सूत्रांनी दिली आहे.
मोबाईल नंबरवरून जळगाव कनेक्शन उघड
मुंबई एनसीबीने नांदेड जिल्ह्यातील नांदेड-हैदराबाद मार्गावर मंजराम (तालुका – नायगाव) येथे कारवाई केली. गुप्त माहिती मिळाल्यानंतर एनसीबीने विशेष मोहीम राबवत ही कारवाई केली. १५ नोव्हेंबरला पहाटेच्या वेळी केलेल्या या कारवाईत एनसीबीने १२ चाकी ट्रक ताब्यात घेतला. यातून एकूण 1127 किलोग्रॅम गांजा जप्त केला. तसेच २ आरोपींना अटक केली. दरम्यान, सूत्रांनी दिलेल्या माहिती नुसार या ट्रकमधील ड्रायव्हर आणि क्लीनरला ट्रकमध्ये नेमकं काय होते?, याबाबत काहीही माहिती नव्हती. तसेच ड्रायव्हर जळगावमधील एकाच्या संपर्कात होता. ड्रायव्हरच्या मोबाईलमध्ये जळगावच्या व्यक्तीचा फक्त नंबर होता. या नंबरवरून एनसीबीच्या पथकाने ‘त्या’ व्यक्तीचे नाव शोधून काढले आहे. तर दुसरीकडे जळगाव कनेक्शन समोर येताच जळगाव पोलीस दलाने देखील आपल्या पद्धतीने तपासाला सुरुवात केली. त्यानुसार आता एनसीबीसह जळगाव पोलीस ‘त्या’ व्यक्तीच्या मागावर असल्याची माहिती सूत्रांनी दिली आहे.
इतर तस्करांनाही अटक होण्याची शक्यता
ट्रकमधील हा गांजा नांदेडमधून जळगावला जाणार होता. तिथं यातील काही गांजा देऊन ही गाडी पुढे महाराष्ट्रभरात गांजाचं वितरण करणार होती. ही मुंबई एनसीबीने केलेल्या सर्वात मोठ्या कारवाईपैकी एक मानली जात आहे. या प्रकरणी एनसीबीने ९८/२०२१ या क्रमांकाने गुन्हा नोंद केला आहे. हा माल कुणाला पोहचवला जाणार होता याचा तपास सुरू आहे. लवकरच यातील इतर तस्करांनाही अटक केली जाण्याची शक्यता आहे. दरम्यान, एएनआयच्या ट्वीटमध्ये चुकून ज्या ठिकाणी ट्रक सापडला, त्याऐवजी ज्या ठिकाणी हा ट्रक जाणार होता म्हणजेच जळगाव जवळील एरंडोलचे नाव टाकले गेल्यामुळे थोडा गोंधळ उडाला होता. परंतू या ट्रकमधील काही प्रमाणातील गांजा एरंडोल येथे येणार होता, हे आता समोर आले आहे. एरंडोलजवळील वनकोठा येथील एक व्यक्ती हा गांजाचा मोठा तस्कर असल्याची माहिती सूत्रांनी दिली आहे. ‘नंदू’ नामक हा व्यक्ती अनेक वर्षापासून हा धंदा करतो, असेही माहिती सूत्रांनी दिलीय.
