बीड (वृत्तसंस्था) पालकांसोबत दसऱ्याचे धुणे धुवायला गेलेल्या दोन बालकांसह त्यांना वाचविण्यासाठी गेलेल्या रिक्षा चालकाचा खदानीत बुडून मृत्यू झाल्याची दुर्दैवी घटना घडलीय. ही घटना शनिवारी (दि. १४) दुपारी ४ वाजेच्या सुमारास केजमधील काझी तलाजवळ घडली. सोमेश्वर गजानन वाघमारे (१५), वैष्णवी गजानन वाघमारे (१२), अविनाश संतोष घोडके (१८) अशी पाण्यात बुडून मरण पावलेल्या मुलांची नावे आहेत.
केज शहरातील गणेश नगर भागातील गजानन वाघमारे यांचे मंगळवार पेठेत फूट फूट केअरचे दुकान आहे. शनिवारी सकाळी दसऱ्याचे पुणे धुण्यासाठी गजानन हे पत्नी आशाबाई, मुलगा सोमेश्वर, मुलगी वैष्णवी, मुलगा रोहित यांना घेऊन केज शहरापासून २ किमी अंतरावर असलेल्या बीड रस्त्यापासून जवळ काझी तलावाजवळ असलेल्या खदाणीत धुणे धुण्यासाठी गेले होते. त्यांनी अविनाश संतोष घोडके यांची रिक्षा भाड्याने घेतली होती.
धुणे धुवून झाल्यानंतर आशाबाई गजानन वाघमारे या खदाणीच्या काठावर अंघोळ करीत असताना त्यांची मुलेही पाण्यात उतरली. पाण्याचा अंदाज न आल्यामुळे याचवेळी मुले पाण्यात बुडू लागली. मुलं डोळ्यासमोर बुडत असल्याचे दिसताच आई उषा गजानन वाघमारे यांनी आक्रोश करून त्यांना वाचवण्याचा स्वतः प्रयत्न करत पाण्यात उतरली. हे पाहून रिक्षा चालक असलेल्या अविनास संतोष घोडके माने पाण्यात उडी मारून आशाबाई वाघमारे व रोहित वाघमारे या दोघांना धरून बाहेर काढले.
यानंतर पाण्यात बुडालेल्या सोमेश्वर गजानन वाघमारे व वैष्णवी गजानन वाघमारे या दोघांना काढण्याचा प्रयत्न करीत अविनाश घोडके हा तरुण ही पाण्यात बुडाला. या दुर्घटनेत तिघांचा बुडून मृत्यू झाला तर दोघे वाचले आहेत. दरम्यान, पाण्यात बुडून मरण पावलेला अविनाश घोडके हा इयता १२ वीच्या वर्गात सोमेश्वर वाघमारे हा इयत्ता ९ वीच्या वर्गात तर वैष्णवी वाघमारे ही इयत्ता ७ वीच्या वर्गात शिकत होती. दुर्दैवी घटनेत वैष्णवी व सोमेश्वर या दोघांस सख्ख्या बहिण भावाबरोबरच त्यांना वाचवायला गेलेला अविनाश घोडके याचाही दुर्दैवी मृत्यू झाल्याने समाज मन सुन्न झाले आहे.