जळगाव (प्रतिनिधी) शहरातील पिंप्राळा रेल्वे गेटजवळ असलेल्या मालधक्क्याजवळ एका तरुणाची निर्घृण हत्या झाल्याची घटना उघडकीस आल्यानंतर प्रचंड खळबळ उडालीय. अनिकेत गणेश गायकवाड (रा. राजमालती नगर, जळगाव) असे मयत तरुणाचे नाव असून दगडाने ठेचून त्याचा खून करण्यात आल्याचे प्राथमिक माहिती मिळत आहे.
यासंदर्भात मयत तरुणाचे वडील गणेश रमेश गायकवाड यांनी शहर पोलीस स्थानकात दिलेल्या फिर्यादीनुसार, दिनांक २४ मे २०२२ रोजी रात्री साडेआठच्या सुमारास कामावरुन घरी आल्यावर त्यांना मुलगा अनिकेत घरी नव्हता. रात्री अडीच वाजेच्या सुमारास परिसरातील अर्जुन धोबी हे पोलिसांसह आले. त्यांनी पिप्राळा रेल्वे गेटजवळ माल धक्कयाचे गोडाऊन समोर एक मृतदेह आढळला असल्याचे सांगितले. तसेच मृतदेहाचा चेहरा तुमच्या मुला सारखा असल्याचे वाटत असल्याचे सांगितले. मृतदेहावरील कपडे, हातातील कडे आणि पायातील काळ्या रंगाचा दोऱ्यावरून मृतदेह अनिकेतचा असल्याची गणेश गायकवाड यांनी खात्री झाली. अनिकेत यांचा कोणीतरी अज्ञात व्यक्तीने त्याचे डोके दगडाने ठेचू त्यास जिवे ठार मारल्याचे स्पष्ट झाले. याप्रकरणी शहर पोलीस स्थानकात अज्ञात मारेकऱ्यांच्या विरोधात भादंवि कलम ३०२ अंतर्गत गुन्हा दाखल करण्यात आला आहे. दरम्यान, पोलिसांनी दोन जणांना ताब्यात घेतले असून त्यांची कसून चौकशी सुरू असल्याचे कळते.
