न्यूयॉर्क (वृत्तसंस्था) अमेरिकेतील टेक्सास (Texas) मधून एक धक्कादायक बातमी समोर आली आहे. टेक्सासमधील एका शाळेत अंदाधुंद गोळीबार झाला आहे. या गोळीबारात एकूण २१ जणांचा मृत्यू झाला आहे. एका १८ वर्षीय तरुणाने हा गोळीबार केला आहे. दरम्यान, पोलिसांनी केलेल्या प्रतिहल्ल्यात तो मारला गेला.
अमेरिकेतल्या टेक्सासमध्ये एका शाळेत अज्ञात व्यक्तीने केलेल्या गोळीबारात २१ जणांचा मृत्यू झाला आहे. टेक्सासमधल्या रॉब एलिमेंट्री स्कूल या ठिकाणी हा प्रकार घडला आहे. रॉब एलिमेंटरी स्कूल हे टेक्सास राज्यात सॅन अँटोनिया शहरापासून १३३ किलोमीटर अंतरावरील युवाल्डी येथे आहे. ही प्राथमिक शाळा असून इथे ५ ते ११ वयोगटातील मुलं शिक्षण घेतात. हल्लेखोर १८ वर्षांचा होता. त्याचं नाव सॅल्व्हाडोर रामोस असं होतं असं टेक्सासच्या गव्हर्नरांनी सांगितलं. पोलिसांनी केलेल्या प्रतिहल्ल्यात तो मारला गेला. या हल्ल्यात जीव गमावलेल्यांमध्ये बहुतांश दुसरी, तिसरी आणि चौथ्या इयत्तेतली मुलं आहेत. ७ ते १० वयोगटातली ही मुलं असल्याचं सांगितलं जात आहे. २१ पैकी १८ मुलं होती तर ३ प्रौढांचाही मृतांमध्ये समावेश आहे.
हे भरुन न येणारं नुकसान- जो बायडन
स्वत:चं मूल गमावणं म्हणजे तुमचा अर्धा जीव गमावल्यासारखंच आहे. तुम्हाला किती अतीव दु:ख झालं असेल हे मी समजू शकतो. हे नुकसान कधीही भरून येऊ शकत नाही असं अमेरिकेचे राष्ट्राध्यक्ष जो बायडन यांनी म्हटलं आहे. बायडन क्वाड संमेलनासाठी जपान दौऱ्यावर गेले होते. व्हाईट हाऊसमध्ये पोहोचताच त्यांनी आपली पत्नी जिल हिच्यासह या दुर्घटनेवर शोक व्यक्त केला.
ते पुढे म्हणाले, “देवाच्या नावावर बंदुकांसाठी लॉबीइंग करणं आपण थांबवणार आहोत? मला याचा त्रास होतो आणि मी थकलोय. या घटनेचा आपल्यावर काहीही परिणाम होणार नाही असं मला सांगू नका. १८ वर्षीय मुलगा दुकानात जातो, बंदूक खरेदी करतो हेच मुळात चुकीचं आहे. अशा प्रकारच्या दुर्देवी गोळीबाराच्या घटना जगात अन्यत्र क्वचितच घडतात. बायडन म्हणाले, “शस्त्रास्त्रांसदर्भातील नव्या कायद्याच्या मार्गात अडथळा आणणाऱ्या लोकांची आता वेळ आली आहे. आम्ही हे विसरणार नाही, आम्ही बरंच काही करू शकतो, आम्हाला आता करुन दाखवावंच लागेल हे त्यांना सांगण्याची वेळ आलीय.”
