दिंडोरी (वृत्तसंस्था) नाशिक-दिंडोरी रस्त्यावरील रणतळेजवळ बस आणि कारची समोरासमोर धडक होऊन भीषण अपघात झाला. अपघातात कारमधील दोघांचा जागीच मृत्यू झाला, तसेच धडकेनंतर दोन्ही वाहनांनी पेट घेतला होता.
नाशिककडून कळवणकडे जाणारी कळवण आगाराची बस (क्र. एमएच ०६ एस ८४३९) व कळवणकडून नाशिककडे येणाऱ्या कारचा अक्राळे फाट्याजवळ अपघात झाला. बस अन्य वाहनाला ओव्हरटेक करीत असताना नाशिककडे जात असलेल्या कारला समोरासमोर धडक बसली. यात दोन्ही वाहनांनी पेट घेतला. यावेळी बसमधील प्रवासी व चालक-वाहक हे प्रसंगावधान राखत बाहेर पडले. कारमधील पाचपैकी मागील सीटवर बसलेले तीनजण बाहेर पडले. मात्र, दोघांचा जागीच मृत्यू झाला. ते परराज्यातील असल्याचा प्राथमिक अंदाज पोलिसांनी व्यक्त केला असून, त्यांची नावे समजू शकली नाही.
घटनेची माहिती मिळताच दिंडोरीचे पोलीस निरीक्षक रघुनाथ शेगर यांच्यासह पथक घटनास्थळी दाखल झाले. यावेळी नाशिक व दिडोरी येथील अग्निशमन दलाची वाहने घटनास्थळी दाखल झाली. जवानांनी आग ओटोक्यात आणली. त्यानंतर कारमधील दोघांना बाहेर काढण्यात आले. यावेळी दोन्ही होरपळून निघाले होते. यावेळी दोघांची ओळख पटवण्याचे प्रयत्न पोलीस करीत आहेत.
