नांदेड ता. धरणगाव (प्रतिनिधी) दुचाकीला कट लागल्याच्या कारणावरून नांदेड गावात एसटी चालकाला मारहाण करण्यात आली होती. त्यानंतर २८ नोव्हेंबरपासून जळगाव व एरंडोल आगाराने नांदेड, साळवा व नारणे गावाकडे येणाऱ्या सर्व फेऱ्या बंद केल्या होत्या. दरम्यान, पालकमंत्री गुलाबराव पाटील यांच्या आदेशाने नांदेड परिसरातील बससेवा पूर्ववत सुरु झाली आहे.
चालकाला मारहाणीनंतर नांदेड येथील बससेवा पूर्णपणे बंद करण्यात आली होती. त्यामुळे संपूर्ण गावाचे वरिष्ठ नागरिकांचे महिलांचे हाल होत होते. ही सर्व माहिती युवा सेना तालुका उपाध्यक्ष भरत सैंदाणे यांनी पालकमंत्री गुलाबराव पाटील यांना दिली होती. ना. पाटील यांनी तात्काळ विभाग नियंत्रक साहेबांना फोन करत नांदेड बस त्वरित सुरू करण्याचे आदेश दिले. त्यानुसार आजपासून बस सुरू करण्यात आली आहे.
यावेळी बसचे जल्लोषात फटाके फोडून पूजा करून नांदेड गावात स्वागत करण्यात आले. यावेळी नांदेड गावचे माजी सैनिक शरद रामचंद्र कोळी यांच्या हस्ते बसची पूजा करून चालक व वाहकाचा शाल व श्रीफळ देऊन सत्कार करण्यात आला. यावेळी गावातील नागरिकांनी यापुढे असा अनुचित प्रकार घडणार नाही, याची हमी दिली. तसेच गावातील नागरिकांनी पालकमंत्री ना. गुलाबराव पाटील आणि एसटी महामंडळाचे आभार मानले. यावेळी गावातील सर्व सुज्ञ नागरिक व शिवसेना आणि युवा सेनेचे कार्यकर्ते उपस्थित होते.
