भुसावळ (प्रतिनिधी) – येथील मृद व जलसंधारण उपविभागात शासकीय वेतन प्रणालीत कथित फेरफार करून तब्बल ८६ लाख ८ हजार ६४३ रुपयांचा अपहार केल्याचा धक्कादायक प्रकार उघडकीस आला आहे. या प्रकरणी विभागातील वरिष्ठ लिपिक तनुज रवींद्र सैंदाणे (रा. पवन हिल्स, जळगाव) याच्याविरुद्ध भुसावळ शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, तनुज सैंदाणे याच्याकडे कार्यालयातील कर्मचाऱ्यांचे वेतन, पूरक देयके तयार करणे तसेच कोषागाराशी संबंधित कामकाजाची जबाबदारी होती. या अधिकाराचा कथित गैरवापर करत फेब्रुवारी २०२१ ते मार्च २०२६ या कालावधीत सेवार्थ प्रणालीमध्ये स्वतःच्या मूळ वेतनासह विविध भत्त्यांमध्ये नियमबाह्य वाढ करण्यात आली. या फेरफाराच्या आधारे तयार केलेली वेतन बिले खरी असल्याचे भासवून ती आहरण व संवितरण अधिकारी तथा उपअभियंता निनाद विवेक रत्नपारखी यांच्या स्वाक्षरीसाठी सादर केली. त्यानंतर ही बिले भुसावळ कोषागार कार्यालयात सादर करून सैंदाणे याने ७० लाख ३८ हजार ३७ रुपये स्वतःच्या बँक खात्यात जमा करून घेतल्याचा आरोप आहे. याशिवाय, राष्ट्रीय निवृत्ती वेतन योजना आणि डीसीपीएस कपातीच्या रकमेतही कथित फेरफार करून १५ लाख ७० हजार ६०६ रुपये स्वतःच्या एनपीएस खात्यात जमा केल्याचे फिर्यादीत नमूद केले आहे.
त्यामुळे शासनाची एकूण ८६ लाख ८ हजार ६४३ रुपयांची फसवणूक झाल्याचा आरोप करण्यात आला आहे. या प्रकरणी उपअभियंता निनाद रत्नपारखी (वय ३२, रा. आदर्श नगर, जळगाव) यांच्या फिर्यादीवरून २५ जूनला भुसावळ शहर पोलीस ठाण्यात गुन्हा दाखल करण्यात आला आहे. तपास पो. नि. महेश गायकवाड यांच्या मार्गदर्शनात सुरू असून आर्थिक व्यवहार, सेवार्थ प्रणालीतील कथित फेरफार आणि संबंधित कागदपत्रांची चौकशी सुरू आहे. तपास पूर्ण झाल्यानंतर या प्रकरणातील आणखी धक्कादायक बाबी समोर येण्याची शक्यता व्यक्त केली जात आहे.
